2021-yilning iyul oyida Germaniyaning g‘arbiy qismida yuz bergan halokatli suv toshqinlari oqibatida ko‘rilgan umumiy zarar rekord miqdorni — 29,2 milliard yevroni tashkil qildi. Bu haqda Tages-Anzeiger nashri xabar berdi.
Ushbu summa Germaniya hukumatining tabiiy ofatlar oqibatlarini bartaraf etish uchun Yevropa Ittifoqi birdamlik fondidan moliyaviy yordam so‘rab Yevropa komissiyasiga yuborgan arizasida ko‘rsatilgan.
Ma’lumotlarga ko‘ra, 2021-yilda tabiiy ofat qoldirgan barcha yo‘qotishlarning yarmidan ko‘pi Reynland-Pfalz federal shtatiga, 40 foizi Shimoliy Reyn-Vestfaliya shtatiga to‘g‘ri keladi. Qolgan mablag‘ Bavariya va Saksoniyadagi vayronagarchilikni qoplash uchun zarur. Qayd etilishicha, bu miqdor Germaniyada 2002 va 2013-yillarda sodir bo‘lgan suv toshqinlaridan ko‘rilgan zarardan bir necha barobar ko‘pdir.
Germaniya bilan bir qatorda Niderlandiya, Belgiya, Lyuksemburg va Avstriya ham Yevropa Ittifoqi birdamlik fondiga yordam so‘rab murojaat qilgan. Bu arizalarning barchasi endi Yevropa Komissiyasi tekshiruvidan o‘tishi kerak. Shu bilan birga, yo‘qotishlarning umumiy miqdori fond hajmidan bir necha baravar ko‘p, chunki hozirga qadar fond har yili 1,3 milliard yevroni o‘z ichiga olar, bu summaning bir qismi uchinchi mamlakatlarga favqulodda to‘lovlar uchun mo‘ljallanar edi.
Hozirgi zarar hisobga olinsa, Germaniya 1,5 milliard yevro talab qilishi mumkin. Biroq Dpa agentligi ma’lumotlariga ko‘ra, bu yil fondda bor-yo‘g‘i 40,7 million yevro mablag‘ mavjud. Pulning qolgan qismi allaqachon sarflangan, shuning uchun fond Germaniyaga yetkazilgan zararning beshdan birini ham qoplay olmaydi.
2021-yil 13-iyuldan G‘arbiy Yevropada kuchli yomg‘irlar kuzatildi va yog‘ingarchilik bir necha kun davomida to‘xtamadi. Germaniya, Belgiya, Shveysariya, Niderlandiya va boshqa davlatlarda daryolar o‘zanlaridan toshishi oqibatida kuchli sel va toshqinlar kuzatildi. 200 dan ziyod odam halok bo‘lgan, shundan 170 dan ortig‘i Germaniyada hayotdan ko‘z yumgan. Suv toshqinlari mamlakat tarixida 60 yil ichidagi eng katta talafotlardan biri bo‘ldi.
Izoh (0)