Saylov o‘tdi, lekin saylovoldi jarayon ko‘ngilni g‘ash qiluvchi (kamida bitta) voqea bilan yodda qoladigan bo‘ldi: “O‘zbekneftgaz” kompaniyasi boshqaruvi raisi o‘rinbosari Muxtor Temirov dastlab 13-Qashqadaryo saylov okrugi matbuot markazi rahbari Jahongir To‘ychiyevni kurakda turmaydigan so‘zlar bilan haqoratladi, ikki mansabdor o‘rtasidagi nizoni yoritishga uringan “Daryo” muxbiri Otabek Qo‘ldoshevga nisbatan esa kuch ishlatdi.
20-oktabr kuni 13-Qashqadaryo saylov okrugi tashabbusi bilan viloyatda faoliyat yurituvchi va Prezident saylovini yoritish uchun akreditatsiyadan o‘tgan jurnalistlar uchun press-tur tashkil etilgan. Press-tur okrug bosh qarorgohidan boshlanib, so‘ng tumanlarda davom etishi lozim edi. Ishtirokchilarni hududlarga olib borish uchun “O‘zbekneftgaz” tomonidan avtobus ajratilgan. Biroq kutilmaganda kompaniya raisi o‘rinbosari Muxtor Temirov “avtobusni olib qo‘ygan”.
Vaziyatga aniqlik kiritish uchun “O‘zbekneftgaz” mansabdorining oldiga borib qaytgan Jahongir To‘ychiyev (u ayni vaqtda viloyat teleradiokompaniyasi direktori ham hisoblanadi) hamkasblariga Temirovdan shikoyat qilgan. “Men bu avtobus press-tur uchun berilganini aytsam, u bunga javoban meni tilga olib bo‘lmas so‘zlar bilan haqoratladi”, — degan To‘ychiyev. Shundan so‘ng To‘ychiyev ham, boshqa jurnalistlar ham “O‘zbekneftgaz” mansabdori nima uchun o‘zini bunday tutayotganiga aniqlik kiritmoqchi bo‘lgan.
“O‘zbekneftgaz” boshqaruvi raisi o‘rinbosari Muxtor Temirov uning oldiga bir guruh kamera ko‘targan jurnalistlar bilan qaytib kelgan Jahongir To‘ychiyevga jurnalistlar oldida izoh bermasligini, u bilan o‘z xonasida xoli gaplashib olishi mumkinligini bildirgan. Shundan so‘ng viloyat saylov okrugi matbuot markazi rahbari ma’lum vaqt yopiq eshiklar ortida “O‘zbekneftgaz” vakili bilan gaplashgan, boshqa jurnalistlar u yerga kiritilmagan.
Birozdan so‘ng ichkariga kirishga muvaffaq bo‘lgan va voqeani tasvirga ola boshlagan “Daryo” muxbiri Otabek Qo‘ldoshev “O‘zbekneftgaz” boshqaruvi raisi o‘rinbosari Muxtor Temirov qarshiligi va qo‘pol munosabatiga duch kelgan. Muxbirning so‘zlariga ko‘ra, mansabdor uni bo‘g‘ib, “ta’zirini berib qo‘yishi”ni aytgan. Shuningdek, Temirov va eshik oldidagi “posbon” muxbirning kamerasini tortib olishga uringan. Ammo atrofdagi jurnalistlarning “Daryo” muxbiriga bergan ko‘magi tufayli ular o‘z niyatiga yetolmagan.
Ma’lumot o‘rnida: Bu mojaro orasida okrug qarorgohiga “O‘zbekneftgaz” mansabdori olib qo‘ygan avtobus o‘rniga jurnalistlarni olib ketish uchun O‘zLiDeP ramzi tushirilgan avtobus yetib kelgan. Ammo OAV vakillari saylovoldi tashviqotni inobatga olib, O‘zLiDeP ramzi tushirilgan avtobusda ketishdan bosh tortgan. Mutasaddilar avtobusdagi partiya logotipini olib tashlashga kirishgan vaqti, jurnalistlar bunga ham qarshi chiqib, tumanlarga boshqa mikroavtobuslarda chiqib ketgan.
Shundan so‘ng “Daryo” muxbiri bilan na Muxtor Temirov, na “O‘zbekneftgaz”ning boshqa bir vakili bog‘langan. “Daryo” internet-nashri “O‘zbekneftgaz” kompaniyasi tomonidan mazkur vaziyat yuzasidan izoh berilishini kutmoqda.
“Daryo” internet-nashri saylovoldi jarayonni yoritishga jalb etilgan jurnalistlarni haqorat qilgan va ulardan biriga qo‘l ko‘targan “O‘zbekneftgaz” rahbari o‘rinbosari Muxtor Temirovning birgina uzr bilan o‘z ishini hech narsa bo‘lmagandek davom ettiraverishiga toqat qilib bo‘lmaydi, deb hisoblaydi. Kompaniya va Energetika vazirligi Muxtor Temirov kabi muomala madaniyati qoniqarsiz bo‘lgan xodimlar o‘rtasida nafaqat jurnalistlar, balki barcha fuqarolar bilan muloqot olib borish odobi yuzasidan tushuntirish ishlarini olib borishi va ularga nisbatan qat’iy ta’sir choralarini ko‘rishi maqsadga muvofiqdir.
Ma’lumot uchun: “Daryo” muxbiri Otabek Qo‘ldoshevning faoliyatiga 2021-yil aprelida Qarshi shahar IIO FMB boshlig‘i o‘rinbosari Azamat Shaymardanov qo‘pollik qilgan edi. Ushbu holat jamoatchilikning keskin noroziligiga sabab bo‘lgan, yakunda Shaymardanovga nisbatan “qattiq hayfsan” intizomiy jazosi qo‘llanilgan edi. O‘shanda prokuratura organlari tayinlangan ushbu jazoning qanchalik haqqoniy va qonuniyligiga baho berilishini bildirgan, biroq baholash natijalari “Daryo”ning bir necha so‘rovlariga qaramay, hamon oshkor qilinmagan.