Dunyo va o‘zbek sportiga oid 27-oktabr kunining eng muhim xabarlari dayjesti bilan tanishing.
O‘zbekiston
O‘zbekiston U-23 terma jamoasi Saudiya Arabistoni bilan durang o‘ynadi
Toshkentda U-23 Osiyo Kubogi—2022 saralash bosqichi D guruhidan o‘rin olgan o‘yinlar bo‘lib o‘tmoqda. 27-oktabr kuni O‘zbekiston U-21 Saudiya Arabistoni U-23 bilan 2:2 hisobida durang o‘ynadi. Guruhning ikkinchi bellashuvida esa Bangladesh U-23 jamoasi Kuvayt bilan bahs olib bordi. Bellashuvda kuvaytliklar 1:0 hisobida g‘alaba qozondi.
Shohjahon Abdullayev JCh—2021 da nokautga uchradi
Serbiyaning Belgrad shahrida boks bo‘yicha JCh—2021 bahslarining 2-kunidan o‘rin olgan bahslar o‘tkazilmoqda.
27-oktabr kuni -86 kg vazn toifasida harakat qiladigan Shohjahon Abdullayev 1/32 final doirasida belgiyalik Viktor Shelstritga qarshi ringga ko‘tarildi. Jang davomida faol harakat qilgan Shohjahon ikkinchi raundning so‘ngida belgiyalik bokschidan kuchli o‘ng qo‘l zarbasini o‘tkazib yubordi va nokautga uchratdi. Shu tariqa o‘zbekistonlik bokschi musobaqadagi ishtirokini yakunladi.
Davlat Bobonov o‘z vazn toifasida jahon reytingida yetakchiga aylandi
Tokio Olimpiadasi sovrindori Davlat Bobonov o‘z vazn toifasida (-90 kg) jahon reytingi yetakchisiga aylandi. Bobonov erkak dzyudochilar umumiy reytingida esa ikkinchi o‘rinni egallab turibdi.
Shu tariqa o‘zbekistonlik dzyudochi 9 yil deganda ilk bor o‘z toifasida reyting peshqadamligini qo‘lga oldi. Oxirgi marta Rishod Sobirov London—2012 Olimpiadasidan avval -60 kg vazn toifasida birinchi o‘rinda qayd etilgan edi.
O‘zbekiston Kubogi 1/4 finali bahslariga hakamlar tayinlandi
Futbol bo‘yicha O‘zbekiston Kubogi 1/4 final o‘yinlari 28—29-oktabr kuni bo‘lib o‘tadi. Professional futbol ligasi (PFL) ushbu bosqichdan o‘rin olgan uchrashuvlarda faoliyat olib boradigan rasmiylar ro‘yxatini e’lon qildi.
O‘zbekiston Kubogi
1/4 final bahslari
28-oktabr, payshanba
“Bunyodkor” — “Surxon”
Hakamlar: Rahimbek Karimov, Abduhamidullo Rasulov, Husniddin Shodmonov, Abdurashid XudoyberganovNazoratchi: Valentin Kovalenko
Komissar: Sherzod Rajabov.
“OKMK” — “Qizilqum”
Hakamlar: Shavkat Nasibullayev, Timur Galeyev, Aleksandr Sidorov, Husan MuzaffarovNazoratchi: Konstantin Smirnov
Komissar: Zoxirjon Akramxonov
29-oktabr, juma
“So‘g‘diyona” — “Nasaf”
Hakamlar: Ilgiz Tantashev, Rasuljon Fozilov, Maksim Nexochin, Ilya IlinNazoratchi: Aleksandr Popov
Komissar: Jahongir Rahmatullayev.
Bekobodning “Metallurg” klubi ispaniyalik Ernandes Martin Luis Manuel bilan shartnoma imzoladi. Bu haqda klub matbuot xizmati xabar bermoqda.
Avvalroq klub Jasur Abduraimovni iste’foga chiqargandi. Bekobod klubi Superliga 23-turidan so‘ng 19 ochko jamg‘argan holda 13-o‘rinni band etgan.
Jahon
Mbappe uzil-kesil “Real”ga o‘tishga qaror qildi
“PSJ” hujumchisi Kilian Mbappe “Real”ga o‘tadi. Jurnalist Janluka Di Marsioning yozishicha, fransiyalik futbolchi Madrid klubi bilan shartnoma borasida kelishuvga erishgan. Biroq u fevral oyigacha unga imzo cheka olmaydi.
Qayd etilishicha, Kilian allaqachon kelajagi borasida yakuniy qarorini qabul qilib bo‘lgan.
Pogba 3 ta o‘yinga diskvalifikatsiya qilindi
“Manchester Yunayted” yarim himoyachisi Pol Pogba “Liverpul”ga qarshi o‘yinda (0:5) olgan qizil kartochkasi sababli APLning 3 ta o‘yinida jamoasiga yordam bera olmaydi.
Manchester klubi sayti xabariga ko‘ra, fransiyalik futbolchi “Tottenhem”, “Manchester Siti” va “Uotford”ga qarshi o‘yinlarni o‘tkazib yuboradi.
Eslatib o‘tamiz, Pogba “Liverpul”ga qarshi o‘yinda Nabi Keytaga nisbatan qo‘pol o‘ynagani uchun qizil kartochka olgandi.
Ansu Fati yana safdan chiqdi
“Barselona” hujumchisi Ansu Fati jarohat sabab noma’lum muddatga safdan chiqqan.
Klub rasmiy saytiga ko‘ra, 18 yoshli futbolchi o‘ng oyoq tizza qismida og‘riq sezgan. Jarohat sabab Fati “Rayo Valyekano”ga qarshi o‘yinni o‘tkazib yuboradi. Uning qachon jarohatdan forig‘ bo‘lishi ham noma’lum.
Qayd etish lozim, Fati sentabr oyida tizzasidagi jarohatdan qutulgandi. Ungacha futbolchi bir yilga yaqin vaqt davomida maydonga tushmagandi.
“Barselona” Kloppning rejalari bilan qiziqmoqda
“Barselona” “Liverpul” bosh murabbiyi Yurgen Kloppning rejalari bilan qiziqmoqda.
Diario Sport nashri Klopp Kataloniya klubini boshqarish uchun asosiy nomzodlardan biri ekanini xabar qilmoqda. Xabarga ko‘ra, “Barselona” 54 yoshli germaniyalik mutaxassisning uzoq muddatli rejalarini o‘rganishga harakat qilmoqda.
Kloppning “Liverpul” bilan amaldagi shartnomasi 2024-yilning iyunida o‘z nihoyasiga yetadi.
“Milan” 69 yil avvalgi rekordini takrorladi
“Milan” A Seriyaning 10-turida “Torino”ni mag‘lub etdi (1:0).
Stefano Pioli shogirdlari Italiya chempionati 2021/22-yilgi mavsumining 10 ta o‘yinidan 9 tasida g‘alaba qozondi (bir durang) va shu tariqa klubning 1954/55-yilgi mavsumdagi rekordini takrorlashga muvaffaq bo‘ldi. Jamoa o‘sha mavsumda A Seriya g‘olibligini qo‘lga kiritgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)