Dunyo va o‘zbek sportiga oid 21-oktabr kunining eng muhim xabarlari dayjesti bilan tanishing.

O‘zbekiston

Diyorbek O‘rozboyev 3 yilga sportdan chetlatildi

Foto: MOQ

Dzyudo bo‘yicha O‘zbekiston terma jamoasi a’zosi, Rio—2016 Olimpiya o‘yinlari sovrindori, Osiyo o‘yinlari g‘olibi, Osiyo chempionati kumush medali sohibi Diyorbek O‘rozboyev organizmida taqiqlangan modda aniqlangani sababli 3 yilga barcha musobaqalardan chetlatildi.

O‘rozboyev O‘zbekiston Milliy antidoping agentligining “Milliy test ro‘yxati”ga kiritilgan bo‘lib, rejali tarzda doping-nazoratidan o‘tishi belgilangan. 2021-yilning 6-may kuni sportchidan doping-sinama olingan. Tekshiruv natijasida sportchi tomonidan Butunjahon antidoping kodeksi va O‘zbekiston Milliy antidoping qoidalarining 2.1-moddasida ko‘rsatilgan antidoping qoidabuzarligi sodir etilgan, ya’ni u meldonium taqiqlangan moddasi iste’mol qilgani aniqlangan.

Natijada O‘rozboyev 3 yil muddatga diskvalifikatsiya qilindi. Diskvalifikatsiya 2021-yil 16-avgustdan 2024-yil 15-avgustga qadar etib belgilandi.

O‘zbekiston boks terma jamoasining JChga boradigan yakuniy tarkibi ma’lum bo‘ldi

Foto: Boks Federatsiyasi

Serbiyaning Belgrad shahrida 25-oktabrdan 6-noyabrga qadar shahrida boks bo‘yicha erkaklar o‘rtasida jahon chempionati bo‘lib o‘tadi. O‘zbekiston terma jamoasining mazkur musobaqada ishtirok etadigan tarkibi ma’lum bo‘ldi.

-48 kg. Nodirjon Mirzahmedov

-51 kg. Hasanboy Do‘stmatov

-54 kg. Shahobiddin Zoirov

-57 kg. Mirazizbek Mirzaxalilov

-60 kg. Abdumalik Halokov

-63,5 kg. Mujibullo Tursunov

-67 kg. Asadxo‘ja Mo‘ydinxo‘jaev

-71 kg. Shahram G‘iyosov

-75 kg. Saidjamshid Jafarov

-80 kg. Odiljon Aslonov

-86 kg. Shohjahon Abdullayev

-92 kg. Madiyar Saidrahimov

+92 kg. Lazizbek Mullajonov.

Jasur Abduraimov “Metallurg”dan iste’foga chiqdi

Foto: “Metallurg”

Jasur Abduraimov “Metallurg” bosh murabbiyligidan ketdi. Bu haqda Bekobod klubi matbuot xizmati xabar berdi.

Qayd etilishicha, klubda bo‘lib o‘tgan yig‘ilishda Abduraimov salomatligi bois faoliyatini davom ettira olmasligini bildirgani ma’lum qilingan. Shartnoma ikki tomonlama kelishuvga muvofiq bekor qilingan.

Osiyo chempionati saralashida ishtirok etadigan O‘zbekiston yoshlar terma jamoasiga jalb etilgan futbolchilar ma’lum qilindi

Futbol bo‘yicha U-23 Osiyo chempionati saralash bosqichi uchun O‘zbekiston yoshlar terma jamoasiga jalb etilgan futbolchilar ro‘yxati ma’lum bo‘ldi.

Foto: O‘FA

Timur Kapadze jamoaga quyidagi futbolchilarni jalb etgan.

Darvozabonlar: Shukron Yo‘ldoshev (“Paxtakor”), Hamidullo Abdunabiyev (“Olimpik”), Vladimir Nazarov (“Olimpik”);

Himoyachilar: Abubakr Rizo Turdaliyev (“Nasaf”), Dostonbek Tursunov (“Olimpik”), Muhammadqodir Hamraliyev (“Dinamo”), Eldorbek Begimov (“Olimpik”), Saidazamat Mirsaidov (“Olimpik”), Bektemir Abdumannonov (“Olimpik”), Odilbek Abdumajidov (“Metallurg”), Asliddin Toshtemirov (“Turon”), Hamid Rustamxonov (“Olimpik”), Sunnatulloh Hamidjonov (“Olimpik”), Shahzod Toirov (“Olimpik”);

Yarim himoyachilar: Abbosbek Fayzullayev (“Paxtakor”), Abdurauf Buriyev (“Olimpik”), Davron Anvarov (“Olimpik”), Diyorbek Rahimqulov (“Andijon”), Ibrohim Ibrohimov (“Metallurg”), Jasurbek Jaloliddinov (“Lokomotiv”), Diyor Xolmatov (“Paxtakor”), Farruxbek Muxtorov (“Olimpik”);

Hujumchilar: Alisher Odilov (“Olimpik”), Otabek Jo‘raqo‘ziyev (“Olimpik”), Ulug‘bek Hoshimov (“Neftchi”), Hojimat Erkinov (“Paxtakor”), Husayn Norchayev (“Nasaf”), Ruslanbek Jiyanov (“Olimpik”).

Foto: O‘FA

Mazkur bosqich o‘yinlari 27-oktabrdan 2-noyabrga qadar Toshkentda bo‘lib o‘tadi. O‘zbekiston D guruhida Saudiya Arabistoni, Bangladesh va Kuvayt bilan kurash olib boradi.

Ma’lumot uchun, musobaqaning final bosqichiga O‘zbekiston mezbonlik qiladi.

Toshkent viloyati derbisida “OKMK”ning qo‘li baland keldi

21-oktabr kuni Superliganing 23-turi start oldi. “Metallurg” o‘z maydonida “OKMK”ni qabul qilib, 0:1 hisobida imkoniyatni boy berib qo‘ydi.

Turning qolgan o‘yinlari 22—25-oktabr kunlari bo‘lib o‘tadi.

Jahon

“Barselona” ham Mbappe uchun kurashga qo‘shildi

Foto: Twitter

“Barselona” 2022-yilning yozida Kilian Mbappe uchun kurashga qo‘shilmoqchi.

As nashriga ko‘ra, katalonlar 22 yoshli futbolchiga klub bilan shartnoma imzolashi uchun 90 million yevro miqdorida bonus taklif qilishga tayyor. Qayd etilishicha, klubda bunday imkoniyat 2022-yilning iyulida bo‘lishi mumkin.

“Ko‘k-anorranglilar”ning fikricha, “Real” Kilianga bonus sifatida atigi 50 million yevro taklif qilishga tayyor. Bundan tashqari, “Barselona” Mbappega “Real”ga qaraganda yuqoriroq maosh taklif qilmoqchi.

Avvalroq Mbappening “PSJ”dan ketishga qaror qilgani va “Real”ga o‘tmoqchiligi xabar qilingandi.

YChLda haftaning eng yaxshi o‘yinchisi nomiga da’vogarlar ma’lum bo‘ldi

UEFA Chempionlar Ligasida haftaning eng yaxshi futbolchisi nomiga da’vogarlarni e’lon qildi.

Foto: UEFA

  • Deyli Blind (“Ayaks”) — “Borussiya D”ga qarshi bahsda (4:0) gol;
  • Noa Okafor (“Zalsburg”) — “Volfsburg”ga qarshi o‘yinda (3:1) 2 ta gol;
  • Alisson Bekker (“Liverpul”) — “Atletiko”ga qarshi bellashuvda (3:2) 3 ta seyv;
  • Sebastyan Koates (“Sporting”) — “Beshiktosh”ga qarshi uchrashuvda (4:1) 2 ta gol.

Shuningdek, tashkilot 3-turining eng yaxshi golini ham e’lon qildi. Unga ko‘ra, “Real” vingeri Vinisius Juniorning “Shaxtyor” darvozasiga kiritgan goli haftaning eng chiroyli goli deb topildi.

JCh—2022 ga 2022-yilning 1-aprel kuni qur’a tashlanadi

Qatarda bo‘lib o‘tadigan 2022-yilgi Jahon Chempionatiga 2022-yilning 1-aprel sanasida qur’a tashlanadi. Bu haqda ESPN xabar berdi.

Musobaqaning saralash va o‘tish o‘yinlari mart oyida yakunlanadi. Musobaqaning o‘zi esa 2022-yilning 21-noyabridan 18-dekabriga qadar bo‘lib o‘tadi.

Ronaldu Chempionlar Ligasi rekordini o‘rnatdi

Foto: Twitter

“Manchester Yunayted” hujumchisi Krishtianu Ronaldu Chempionlar Ligasi doirasidagi o‘yinda “Atalanta” darvozasiga gol urdi.

Bergamo klubi Ronaldu Chempionlar Ligasida gol urgan 38-jamoaga aylandi. Bu Chempionlar Ligasi rekordi hisoblanadi.

Qayd etish kerak, 19-oktabr kuni Lionel Messi “Leypsig” darvozasiga ikkita gol urib, musobaqada gol urgan jamoalari sonini 37 taga yetkazib olgandi va Ronaldu bilan tenglashgandi.

Shuningdek, Ronaldu Chempionlar Ligasida gol urish borasida ham eng yaxshi natijaga ega — 137 ta gol.

“Barselona” Fati bilan uzoq yillik shartnoma imzoladi

Foto: Twitter

“Barselona” vinger Ansu Fati bilan yangi shartnoma imzolaganini e’lon qildi.

Klub 18 yoshli futbolchi bilan 2027-yilning 30-iyunigacha mo‘ljallangan yangi bitimni imzolagan. Shartnomada futbolchining tovon puli 1 milliard yevro etib belgilangan.

Fati klub akademiyasi tarbiyalanuvchisi hisoblanadi, u 2019-yilda jamoadagi debyutini o‘tkazgan.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!