Rossiyada o‘tgan bir sutka ichida yana 37 678 kishida koronavirus tasdiqlandi. Bu haqda COVID-19 ga qarshi kurash bo‘yicha federal tezkor shtabga tayanib, Meduza xabar berdi. Bu mamlakatda pandemiya boshlanganidan buyon kunlik kasallanish bo‘yicha rekord ko‘rsatkich hisoblanadi.
Shuningdek, o‘tgan bir sutka davomida 1075 kishi koronavirus asoratlari oqibatida vafot etgan — bu ham antirekord.
Tezkor shtab ma’lumotlariga ko‘ra, Rossiyada koronavirusga chalinganlarning umumiy soni 8 205 983 kishiga yetgan, hozirga qadar 228 528 kishi COVID-19 qurboniga aylangan.
Rossiya prezidenti Vladimir Putin mamlakatda koronavirus infeksiyasi bilan kasallanish holatlari ortayotgani sabab 30-oktabrdan 7-noyabrda qadar (4-noyabr kuni Xalq birligi kuni nishonlanadi, 5-noyabrdan 7-noyabrgacha shundoq ham dam olish kunlari edi) ishga chiqilmaydigan haftalik deya e’lon qilgan. Epidemiologik vaziyat keskin tus olgan viloyatlarda ishlanmaydigan haftalikni oldinroq joriy etishga ruxsat berilgan. Masalan, Moskva va Moskva viloyatida ishga chiqilmaydigan kunlar 28-oktabrdan boshlanadi.
Avvalroq Rossiyada COVID-19 ning yangi to‘lqini yuz berayotgani, bunga koronavirus delta (“hindcha”) shtammi bilan bog‘liq vaziyat sabab bo‘lgani to‘g‘risida xabar berilgandi. Kaliningrad viloyatida “COVID-19 bilan bog‘liq o‘ta og‘ir vaziyat” tufayli muntazam tibbiy yordam ko‘rsatish to‘xtatilishi, kafe va restoranlar (8-oktabrdan ularga sertifikatsiz kirish taqiqlangan) bilan birga barcha jamoat joylarida QR-kod tizimi joriy etilishi mumkin. Hozirda Novosibirsk, Sverdlovsk va Smolensk viloyatlari, Kareliya, Mari El va Komi Respublikasida QR-kod tizimining u yoki bu shaklda joriy etilishi e’lon qilingan.
Mavzuga doir:
Izoh (0)