Gruziya sobiq prezidenti Mixail Saakashviliga shifokorlar tomonidan qon quyish amaliyoti bajarilgach, uning sog‘lig‘i barqarorlashdi. Bu haqda sobiq prezidentning shaxsiy shifokori Nikoloz Kipshidzega tayanib, “Interfaks” xabar berdi.
“Saakashvilidan olingan qon tahlillaridan biri yomon chiqqandi, shu sababli mahalliy qamoqxona shifokorlari va reanimobil brigadasi menga qon quyishda yordam berdi, shundan keyin Saakashvilining ahvoli barqarorlashdi”, — deydi Kipshidze.
Uning hisoblashicha, Saakashvilini shahar klinikasiga, shifokorlar nazorati ostiga joylashtirish kerak, chunki “holat yana takrorlanishi mumkin, qamoqxona shifoxonasida esa unga yordam ko‘rsatish qiyin bo‘ladi”.
“Hozirda Saakashvilining sog‘lig‘i kechagidan ko‘ra qoniqarli”, — deydi Kipshidze.
Eslatib o‘tamiz, 1-oktabr kuni Mixail Saakashvili sakkiz yildan buyon birinchi marta Gruziyaga keldi. U chegarani noqonuniy kesib o‘tganlik ayblovi bilan qo‘lga olindi. Shundan keyin Gruziyada muxolifat norozilik namoyishlari boshlandi, ular Saakashvili ozod etilishini talab qildi.
Mavzuga doir: “Misha, biz keldik”. Saakashvilining qaytishi va qamoqqa olinishi qanday qilib Gruziyani ikkiga bo‘lib yubordi?
Avvalroq shifokorlar konsiliumi Gruziya sog‘liqni saqlash vazirligi vakillari va qamoqxonadagi tibbiyot xodimlari ishtirokida uni ko‘rikdan o‘tkazgandi. Ular sobiq davlat rahbarining ancha kuch yo‘qotgani, biroq uning sog‘lig‘iga xavf soladigan kasalliklar yo‘qligi haqida tashxis qo‘ygan. Konsilium Mixail Saakashvilini shifoxonaga ko‘chirishni tavsiya etgan.
Gruziya adliya vaziri Rati Bregadze shifokorlar kengashiga javoban ularning barcha tavsiyalariga qat’iy rioya etilishini bildirgan. Vazir Mixail Saakashvili shifoxonaga o‘tkazilishi, biroq bu uning partiyadoshlari hamda tarafdorlari istaganidek fuqarolik muassasasi, shahar kasalxonasi emas balki jazoni ijro etish maskanidagi tibbiyot bo‘limi bo‘lishini tushuntirgan.
Izoh (0)