AQSh administratsiyasi 15-dekabrga qadar mamlakatning 35-prezidenti Jon Kennedining o‘ldirilishiga bog‘liq yangi materiallarni e’lon qilish niyatida. Bu haqda Oq uy tomonidan e’lon qilingan bayonotga tayanib, “TASS” xabar berdi.
Unda keltirilishicha, AQSh Kongressi 1992-yilda Kennedining o‘ldirilishiga bog‘liq barcha ma’lumotlar mudofaa, razvedka, huquq-tartibot organlari yoki mamlakat tashqi siyosatiga zarar keltirmasa, “bosqichma-bosqich oshkor etilishi lozim”ligini e’lon qilgan. Amerika idoralari ushbu hujjatlarni tekshirish bilan shug‘ullanmoqda.
AQShning amaldagi prezidenti Jo Bayden ushbu materiallarni e’lon qilish tartibini tasdiqlagan. Ularning bir qismi 2021-yil 15-dekabrda e’lon qilinishi kutilmoqda. Bu hokimiyat vakillarining e’tiroziga sabab bo‘lmagan ma’lumotlar hisoblanadi.
Amerika idoralari ma’lumotlarning ikkinchi qismi e’lon qilinishini kechiktirishni so‘ragan. Taxminlarga ko‘ra, u 2022-yilning 15-dekabriga qadar oshkor etilmaydi. Bayonotda ta’kidlanishicha, bu boradagi oldingi tavsiyalar AQSh Milliy arxivlar va yozuvlar boshqarmasi rahbariyati tomonidan berilgan.
Eslatib o‘tamiz, 2017-yilda AQShda KGB agentining Jon Kennedining o‘ldirib ketilishi haqidagi ish bo‘yicha ko‘rsatmalari e’lon qilingandi. E’lon qilingan materiallar orasida KGB (Sobiq Ittifoqda Davlat xavfsizligi qo‘mitasi) agenti Yuriy Nosenko bilan intervyudan 17 ta audiofayl bor, u 1964-yil yanvarida, Kennedining o‘limidan keyingina AQShga qochib o‘tgan edi.
Izoh (0)