Siyosiy faoliyatda kiyinish uslubi ham katta rol o‘ynaydi. Ranglar, o‘ziga xoslik, siluet, shuningdek, aksessuarlar inson fe’l-atvori haqida ko‘p narsani anglatadi. Ayniqsa, u siyosatchi, vitse-prezident lavozimini egallagan ilk ayol bo‘lsa. Taxmin qilganingizdek, gap so‘nggi kunlarda eng ko‘p muhokama qilinayotgan inson — Kamala Xarris haqida ketyapti. 20-oktabr kuni 57 yoshni qarshilagan, kiyim borasida vazminlik bilan tanlov qiladigan Kamalaning kiyinish uslubidagi o‘ziga xosliklarga to‘xtalib o‘tamiz.
Bel qismiga urg‘u berilgan jaketlar
Kamala Xarris jaketlarni juda ham yaxshi ko‘radi. Kostyum-shim kiyishni afzal biladigan Kamala uni futbolka yoki kofta bilan moslaydi. Aftidan, aynan shunday obrazda o‘zini dadil va qat’iyatli his qiladi. Omma oldida chiqish uchun kiyimlar harakatlarni cheklamasligi muhim hisoblanadi, Kamala esa bu borada mukammal formulani topishning uddasidan chiqqan. Uzunroq turadigan jaket, yopishib turadigan jinsi va belga urg‘u berilishi Xarrisga xos obraz sanaladi. Voqea yoki mavsumdan qat’iy nazar, rang va mato o‘zgarmaydi, siluetidan AQSh vitse-prezidentini hamisha uzoqdan tanish mumkin.
Marvaridli taqinchoq
Aksessuar ham u yoki bu shaxsga xos “tashrif qog‘ozi” bo‘lishi mumkin, masalan, Rut Ginzburgning oq, to‘rli yoqasi bunga yaqqol isbot bo‘la oladi. Kamala aksariyat hollarda marvaridli taqinchoqlarni taqishni xush ko‘radi. AQSh vitse-prezidenti omma oldida qora va oq marvaridli taqinchoq bilan bir emas, bir necha marta ko‘rinish bergan.
Keda
Rasmiy kostyumlar bilan birgalikda neytral rangdagi uchli tufli kiyish o‘ziga xos ko‘rinishini hech kim inkor qilmaydi. Ammo mana deyarli 10 yildirki, ayol-qizlar keda va krossovkalarni barcha narsa bilan moslab kiyadi. 2020-yilgi saylov vaqtida Kamala Xarris Converse Chuck Taylor All-Star’dan bir necha marta ilhomlangan. Converse Kamala uchun 2020-yildagi saylovning ajralmas qismiga aylangan desa ham, xato bo‘lmaydi. Tarmoqlarda hatto “Bog‘ichlarni bog‘la, niqob taq va saylovga bor”, — degan shior tushirilgan suratlar tarqalgan.
Timberlendlar
Kamalaning yana bir sevimli poyabzali Timberland brendining hajmli botinkalari hisoblanadi. Davlatning birinchi shaxslari nafaqat bayonot bilan chiqish qiladi, balki tabiiy ofat va boshqa vaziyatlarda turli joylarga ham tashrif buyuradi. Shu singari Kamala ham Kaliforniyadagi yong‘inga aynan shu poyabzalda borgan. Uning jiyani Mina Xarris Kamala samolyotdan timberlendda tushib kelgan videoga izoh ham yozib qoldirgan. U o‘z uslubi orqali xalqqa yaqinligini namoyon qiladi.
Sport uslubidagi kiyim
2020-yil 7-noyabr kuni ertalab, saylov natijalari e’lon qilingan vaqtda Kamala yugurishda bo‘lgan. Jo Baydenning “Biz buni uddaladik” degan ovozi jaranglagan video bir necha kun ichida internetda virusdek tarqalgan. O‘sha vaqt Kamal to‘q kulrang sport kiyimida bo‘lgan, qora ko‘zoynak taqqan va sochlarini tepadan yig‘ib olgan edi.
Oq rang
Bo‘lajak vitse-prezidentning birinchi nutqi muhim hodisa bo‘lgan. Buning uchun Kamala oppoq kostyum tanlagan. Gap shundaki, oq sufrajistlar harakati va ayollarga xos birdamlikning ramzi hisoblanadi. Xilari Klinton 2016-yili prezidentlikka nomzod bo‘lganida ham aynan mazkur uslubdan foydalangan edi. Oqdan tashqari, sufrajistlar binafsha rang va sariqdan ham foydalangan bo‘lib, bu sadoqat, soflik hamda umid ramzi hisoblanadi. Shundan kelib chiqib, Xarris hali ushbu ranglardan ko‘p foydalansa kerak, deb taxmin qilish mumkin.
Bantli bluzka va bo‘yinga taqiladigan ro‘mol
Kamala jiddiy ish uslubida kiyinishni afzal bilishiga qaramay, tez-tez ayollarga xos bantli bluzkalar yoki bo‘yinga taqiladigan ro‘mollarni ham tanlab turadi. Bu obrazga nafislik qo‘shishning eng yaxshi usuli hisoblanadi. Kamala hamisha dress-kodlarga amal qiladi va shunda ham uning kiyimlari zerikarli ko‘rinib ham qolmaydi.
Izoh (0)