Сиёсий фаолиятда кийиниш услуби ҳам катта рол ўйнайди. Ранглар, ўзига хослик, силуэт, шунингдек, аксессуарлар инсон феъл-атвори ҳақида кўп нарсани англатади. Айниқса, у сиёсатчи, вице-президент лавозимини эгаллаган илк аёл бўлса. Тахмин қилганингиздек, гап сўнгги кунларда энг кўп муҳокама қилинаётган инсон — Камала Харрис ҳақида кетяпти. 20 октябрь куни 57 ёшни қаршилаган, кийим борасида вазминлик билан танлов қиладиган Камаланинг кийиниш услубидаги ўзига хосликларга тўхталиб ўтамиз.
Бел қисмига урғу берилган жакетлар
Камала Харрис жакетларни жуда ҳам яхши кўради. Костюм-шим кийишни афзал биладиган Камала уни футболка ёки кофта билан мослайди. Афтидан, айнан шундай образда ўзини дадил ва қатъиятли ҳис қилади. Омма олдида чиқиш учун кийимлар ҳаракатларни чекламаслиги муҳим ҳисобланади, Камала эса бу борада мукаммал формулани топишнинг уддасидан чиққан. Узунроқ турадиган жакет, ёпишиб турадиган жинси ва белга урғу берилиши Харрисга хос образ саналади. Воқеа ёки мавсумдан қатъий назар, ранг ва мато ўзгармайди, силуэтидан АҚШ вице-президентини ҳамиша узоқдан таниш мумкин.
Марваридли тақинчоқ
Аксессуар ҳам у ёки бу шахсга хос «ташриф қоғози» бўлиши мумкин, масалан, Рут Гинзбургнинг оқ, тўрли ёқаси бунга яққол исбот бўла олади. Камала аксарият ҳолларда марваридли тақинчоқларни тақишни хуш кўради. АҚШ вице-президенти омма олдида қора ва оқ марваридли тақинчоқ билан бир эмас, бир неча марта кўриниш берган.
Кеда
Расмий костюмлар билан биргаликда нейтрал рангдаги учли туфли кийиш ўзига хос кўринишини ҳеч ким инкор қилмайди. Аммо мана деярли 10 йилдирки, аёл-қизлар кеда ва кроссовкаларни барча нарса билан мослаб кияди. 2020 йилги сайлов вақтида Камала Харрис Converse Chuck Taylor All-Star’дан бир неча марта илҳомланган. Converse Камала учун 2020 йилдаги сайловнинг ажралмас қисмига айланган деса ҳам, хато бўлмайди. Тармоқларда ҳатто «Боғичларни боғла, ниқоб тақ ва сайловга бор», — деган шиор туширилган суратлар тарқалган.
Тимберлендлар
Камаланинг яна бир севимли пойабзали Timberland брендининг ҳажмли ботинкалари ҳисобланади. Давлатнинг биринчи шахслари нафақат баёнот билан чиқиш қилади, балки табиий офат ва бошқа вазиятларда турли жойларга ҳам ташриф буюради. Шу сингари Камала ҳам Калифорниядаги ёнғинга айнан шу пойабзалда борган. Унинг жияни Мина Харрис Камала самолётдан тимберлендда тушиб келган видеога изоҳ ҳам ёзиб қолдирган. У ўз услуби орқали халққа яқинлигини намоён қилади.
Спорт услубидаги кийим
2020 йил 7 ноябрь куни эрталаб, сайлов натижалари эълон қилинган вақтда Камала югуришда бўлган. Жо Байденнинг «Биз буни уддаладик» деган овози жаранглаган видео бир неча кун ичида интернетда вирусдек тарқалган. Ўша вақт Камал тўқ кул ранг спорт кийимида бўлган, қора кўзойнак таққан ва сочларини тепадан йиғиб олган эди.
Оқ ранг
Бўлажак вице-президентнинг биринчи нутқи муҳим ҳодиса бўлган. Бунинг учун Камала оппоқ костюм танлаган. Гап шундаки, оқ суфражистлар ҳаракати ва аёлларга хос бирдамликнинг рамзи ҳисобланади. Хилари Клинтон 2016 йили президентликка номзод бўлганида ҳам айнан мазкур услубдан фойдаланган эди. Оқдан ташқари, суфражистлар бинафша ранг ва сариқдан ҳам фойдаланган бўлиб, бу садоқат, софлик ҳамда умид рамзи ҳисобланади. Шундан келиб чиқиб, Харрис ҳали ушбу ранглардан кўп фойдаланса керак, деб тахмин қилиш мумкин.
Бантли блузка ва бўйинга тақиладиган рўмол
Камала жиддий иш услубида кийинишни афзал билишига қарамай, тез-тез аёлларга хос бантли блузкалар ёки бўйинга тақиладиган рўмолларни ҳам танлаб туради. Бу образга нафислик қўшишнинг энг яхши усули ҳисобланади. Камала ҳамиша дресс-кодларга амал қилади ва шунда ҳам унинг кийимлари зерикарли кўриниб ҳам қолмайди.
Изоҳ (0)