Qashqadaryoda prezidentlik saylovida muddatidan oldin ovoz berganlar ovoz berishning dastlabki uch kunida 4402 nafarni tashkil qildi. Bu haqda “Daryo”ga 13-Qashqadaryo okrug saylov komissiyasi matbuot markazi mas’uli Tolib Temirov xabar berdi.

Foto: 13-Qashqadaryo okrug saylov komissiyasi matbuot markazi

Qayd etilishicha, bu haqda viloyat okrug saylov komissiyasining navbatdagi yig‘ilishida ma’lum qilingan.

“Yig‘ilishda saylovga ko‘rilayotgan hozirlik, ayni paytda kechayotgan jarayonlar, xususan, joylarda muddatidan oldin ovoz berishning borishi, saylov uchastkalarining muhim siyosiy jarayonga taxtligi holati va komissiya vakolati doirasidagi bir qator masalalar muhokama etildi. Yig‘ilishda ta’kidlandiki, saylovning ko‘tarinki kayfiyatda va yuqori tashkiliy darajada o‘tishi saylov uchastkalarida unga nechog‘li puxta tayyorgarlik ko‘rilganiga bog‘liq. Shu nuqtayi nazardan viloyatdagi saylov uchastkalarida barcha sharoit yaratilib, shay holatga keltirildi. Ular milliy saylov qonunchiligi doirasida jihozlandi. Pandemiya sharoitidan kelib chiqib, mamlakatimizda belgilangan karantin qoidalariga qat’iy rioya etish choralari ko‘rildi”, — deydi Tolib Temirov.

Tolib Temirovning ma’lumot berishicha, muddatidan oldin ovoz berish boshlangan kun — 2021-yilning 14-oktabr kunidan 17-oktabr kuni kechgacha viloyatda ovoz berganlar soni 4 ming 402 nafarni tashkil qilgan.

Mas’ulning qo‘shimcha qilishicha, bu yilgi prezidentlik saylovida viloyatdan 1 million 870 mingga yaqin saylovchi ishtirok etishi kutilmoqda. Shundan 143 mingdan ortig‘i saylovda birinchi marotaba ishtirok etayotgan yoshlar hisoblanadi.