Infinix kompaniyasi ulkan IPS-displeylar bilan jihozlangan Note 11 va Note 11 Pro modellarini taqdim etdi, deb xabar beradi Hi-Tech.Mail.ru.
Foto: GSMarena
Ekran o‘lchami jihatidan yangi modellar telefonni emas, balki kichikroq planshetlarni yodga soladi. Oldingi lineykalardan farqli o‘laroq, Note 11 ekranining yangilanish chastotasi 120 gertsni tashkil etadi (oldin 90 gerts edi). Sensorli ekranga teginish chastotasi Infinix Note 10 Pro’dagidek qolgan — 180 gerts.
Smartfonlarga 12 nanometrli texnologik jarayon asosida tayyorlangan MediaTek Helio G96 protsessori o‘rnatilgan. Pro-modelning ichki xotirasi 128 gigabaytni tashkil etadi (microSD uchun slot ham mavjud), 8 gigabaytga teng tezkor xotirani esa kengaytirish imkoni bor. Chunki Android 11 bazasidagi XOS 10 yangi dasturiy ta’minoti 3 gigabaytli virtual tezkor xotirani taqdim etishga qodir.
Lineykadagi bazaviy modelning asosiy kamerasi 50 megapiksellni tashkil etadi va 2 megapikselli televik ham mavjud. Pro-modelning jamlanmasi qiziqroq: 64 megapikselli asosiy sensor, 30 karra yaqinlashtirish imkoniyatiga ega 13 megapikselli teleobyektiv va 2 megapikselli chuqurlikni o‘lchovchi datchik. Ikkala modelga ham 16 megapikselli frontal kameralar o‘rnatilgan.
Yangi qurilmalar sig‘imi 5000 mA/soatga teng akkumulyatorlar bilan jihozlangan bo‘lib, u 33 vattli tezkor quvvatlanish funksiyasiga ega. Pro-versiya stereodinamiklari (yuqori va pastki) bilan farqlanadi.
Infinix Note 11 Pro modeli uch xil rangda taqdim etiladi: kulrang, yashil va havorang. Infinix Note 11 esa oq, qora va yashil ranglarda sotuvga chiqadi. Smartfonlar narxi hozircha oshkor etilmagan.
Avvalroq Oppo’ning 625 dollarlik flagmani Samsung Galaxy S21 Ultra’dan yaxshiroq videoga olayotgani, geymerlar uchun Black Shark 4S va 4S Pro kuchli smartfonlari taqdim etilgani to‘g‘risida xabar berilgandi.
