Xiaomi kompaniyasi geymerlar uchun FHD+ AMOLED-ekranlari bilan jihozlangan Black Shark 4S va 4S Pro smartfonlarini taqdim etdi, deb xabar beradi Hi-Tech.Mail.ru.
Xiaomi Black Shark 4S va 4S Pro o‘yin smartfonlariga Full HD+ sifatni qo‘llab-quvvatlovchi 6,67 dyuymli Samsung E4 AMOLED displeylari o‘rnatilgan. Ekranning yangilanish chastotasi 144 gertsga teng, sensorning teginishlarni qabul qiluvchi 720 gerts chastotasi esa tasvir sifatini ta’minlaydi.
Bazaviy modelning “yuragi” sifatida 8/12 gigabayt tezkor va 128/256 gigabayt ichki xotira bilan Snapdragon 870 protsessori tanlangan. Pro-versiyaning protsessori kuchliroq — Snapdragon 888 Plus. Tezkor xotirasi sig‘imi ham katta — 12/16 gigabayt, ichki xotirasi esa 256/512 gigabaytni tashkil etadi.
GSMarena ma’lumotlariga ko‘ra, bazaviy va Pro-versiya UFS 3.1 xotira chiplari va RAID sozlamada SSD’ga ega bo‘lib, bu qurilmaning bozordagi boshqa smartfonlar bilan taqqoslaganda yozuvlarni yuqori tezlikda o‘qishini ta’minlaydi. Ikkala smartfon ham Android 11 asosidan JoyUI 12.9 operatsion tizimida ishlaydi.
Smartfonlarning ikkisiga ham 20 megapikselli selfi-kameralar o‘rnatilgan. Asosiy kamera modulida 8 megapikselli o‘ta keng burchakli obyektiv, 5 megapikselli chuqurlikni o‘lchovchi datchik joylashgan, lineykadagi modellar faqat asosiy datchiklari o‘zaro farq qiladi: 4S’ga 48 megapikselli, Pro’ga 64 megapikselli kamera o‘rnatilgan.
Yangi qurilmalardagi batareyalarning sig‘imi 4500 mA/soatga teng bo‘lib, 120 vattli tezkor quvvatlanish funksiyasiga ega. Shuningdek, barcha standart ulanishlar mavjud: Wi-Fi 6 (802.11ax), Bluetooth 5.2, GPS/GLONASS/Beidou va NFC chip. Barmoq izi skaneri ekran ostida joylashgan.
Black Shark 4S narxi 2699 yuandan (420 dollar), Pro-versiyaniki 4799 yuandan (745 dollar) boshlanadi. Shuningdek, korpusining shakli bilan ajralib turuvchi 12/256 gigabayt xotiraga ega Guandam Edition versiyasi ham mavjud bo‘lib, uning narxi 3499 yuanga (545 dollar) teng.
Eslatib o‘tamiz, 2021-yilning martida Xiaomi geymerlar uchun Black Shark 4 va 4 Pro flagmanlarini taqdim etgandi.
Izoh (0)