Buxoro viloyati Kogon shahrining sobiq hokimi Hakim Hoshimov 17-oktabr kuni 58 yoshida og‘ir xastalikdan vafot etdi. Bu haqda “Daryo” muxbiri xabar berdi.
2018-yilning 7-fevralida Kogon shahri hokimi etib tayinlangan Hakim Hoshimov Prezident Shavkat Mirziyoyevning Buxoro viloyatiga tashrifi chog‘ida Kogon shahrining to‘rt sektor rahbarlari tanqid ostiga olingandan so‘ng, 2021-yilning 3-martida lavozimidan ozod etilgan edi.
U shu kuni sessiyadan so‘ng jurnalist va blogerlar bilan muloqotda keyingi ikki yilda hokimlik faoliyatini olib borishida sog‘lig‘i pand berayotganini bildirgan. U hayotlik davrining so‘nggi ikki yilida oshqozon o‘sma xastaligini hamda og‘ir operatsiyani boshdan kechirgan.
Ma’lumot uchun, Hakim Hoshimov 1963-yil Buxoro viloyati Vobkent tumanida tug‘ilgan. 1985-yil Toshkent politexnika instituti tamomlagan.
2002—2004-yillarda Buxoro shahar Fayzulla Xo‘jayev tumani hokimining birinchi o‘rinbosari, 2004—2010-yillarda Buxoro shahar hokimining kapital qurilish, kommunikatsiyalar, kommunal xo‘jalik va obodonlashtirish masalalari bo‘yicha birinchi o‘rinbosari, 2010—2014-yillarda Osiyo taraqqiyot banki ishtirokida Buxoro viloyati tumanlarini toza ichimlik suvi bilan ta’minlashni yaxshilash bo‘yicha loyihani amalga oshirish guruhi rahbari bo‘lgan.
2014—2017-yillarda Buxoro viloyati “Suvoqova” DUK bo‘lim boshlig‘i, korxona boshlig‘i o‘rinbosari, korxona boshlig‘i, 2017—2018-yillarda Buxoro viloyati uy-joy kommunal xizmat ko‘rsatish boshqarmasi boshlig‘i lavozimlarida faoliyat yuritgan.
Eslatib o‘tamiz, 2021-yil 12-avgustida Аndijon viloyatining Аndijon tumaniga 13 yil hokimlik qilgan Hasanboy Hakimov 78 yoshida vafot etgandi. O‘sha yilning 31-iyulida Andijon viloyati Bo‘ston tumani hokimi Sadbarxon Mamitova, 18-iyulida Toshkentning Olmazor tumani hokimi Abdumajid Mullajonov 51 yoshida vafot etgandi.
Izoh (0)