O‘zbekistonda gaz ta’minoti doirasida kuz—qish mavsumiga tayyorgarlik ko‘rish va uni betalafot o‘tkazish bo‘yicha olib borilgan chora-tadbirlar natijasida umumiy ishlarning 96 foizi bajarilgan. Bu haqda Energetika vazirligi matbuot xizmati xabar berdi.
Ma’lum qilinishicha, 20—24-sentabr kunlari o‘tkazilgan o‘rganishlar davomida respublika bo‘yicha tabiiy gazdan 67 ta noqonuniy foydalanish holati aniqlangan. Ushbu qisqa 4 kun ichida 1 millon 379 ming kub metr tabiiy gazdan noqonuniy foydalanilgan. Taqqoslash uchun, ushbu hajmdagi tabiiy gaz hozirgi kunda 130 mingta xonadonning 1 kunlik gaz iste’molini tashkil qiladi.
“Noqonuniy foydalanish holatlarining eng ko‘pi Xorazm, Farg‘ona va Toshkent viloyatlari hisobiga to‘g‘ri keladi”, — deyiladi xabarda.
Ta’kidlanishicha, 2021-yilning 9 oyida respublika bo‘yicha tabiiy gazdan jami 2535 ta noqonuniy foydalanish holati aniqlangan. Buning natijasida 86 million 923 ming kub metr yoki 77 milliard 877 million so‘mlik tabiiy gazdan noqonuniy foydalanilgan.
Taqqoslash uchun, ushbu miqdordagi hajm hozirgi kunda 40 mingta xonadonning qariyib 1 yillik iste’molini tashkil etadi.
Ma’lumotlarga ko‘ra, 2021-yilda gaz tarmoqlarini tartibga keltirish bo‘yicha rejalashtirilayotgan chora-tadbirlarning to‘liq amalga oshirilishi natijasida 283 mingta aholi xonadonlarining tabiiy gaz ta’minoti yaxshilangan. Xususan, kuz—qish mavsumida tabiiy gaz ta’minoti bo‘yicha yuridik iste’molchilarga 18 milliard kub metr, aholi iste’molchilariga esa 11 milliard kub metr tabiiy gaz yetkazib beriladi. Bu esa o‘tgan mavsumga nisbatan 3 milliard kub metrga ko‘p.
Shuningdek, kuz—qish mavsumida iste’molchilarga 318 ming 600 tonna suyultirilan gaz yetkazib beriladi. Bu ko‘rsatkich o‘tgan yilga nisbatan 13 ming tonnaga ko‘p.
“Biroq ishlab chiqarish va yetkazib berish hajmi qanchalik oshirilmasin, iqtisodiyot tarmoqlari, ijtimoiy soha obyektlari va xonadonlarning energiya samaradorligiga e’tibor berilmasa, ko‘rilayotgan choralar samarasini bermasligi mumkin. Buning natijasida tarmoqda uzilish holatlari yuzaga kelishi va iste’molchilarning haqli e’tirozlariga sabab bo‘lishi mumkin”, — deyiladi xabarda.
Izoh (0)