Kaliforniya texnologik instituti (Caltech) tadqiqotchilari arqon ustida yurishga, parvoz qilish va snoubord uchishga qodir yangi robotini namoyish etdi. Leonardo nomini olgan robot xavfli missiyalarni bajarishga qodir, deb xabar beradi Hi-Tech.Mail.ru.
Skrinshot: Aerospace Robotics and Control at Caltech
Kaliforniya texnologik instituti Avtonom tizimlar va texnologiya markazi birinchi bor robotni 2019-yilda taqdim etgandi, biroq bundan oldingi model hozirgidek yaxshi jihozlanmagan edi. Robot yura olmasdi, uning dvigatellaridan esa faqat sakrashda foydalanilgan. Leg On Aerial Robotic DrOne (LEONARDO) nomini olgan yangi robot esa baland binodan sakrashga va muvozanatini saqlashga qodir. Muhandislar robotni yaratishga qushlarning parvozi va yurishidan ilhomlangan.
Muhandislar jamoasining ma’lum qilishicha, mazkur ixtiro uskunalarni boshqa sayyoralarda, masalan, Marsda tashishi mumkin. Leonardo’ning oyoqlari yengil metalldan ishlangan bo‘lib, bu dvigatellarga tushadigan yuklamani kamaytiradi, shuning uchun u yurish yoki parvozni almashtira oladi.
Robot bo‘yining balandligi 76 santimetrga teng bo‘lib, oyoqlarini yaxshi nazorat qila olgani uchun muvozanatini ushlay oladi. Parvoz vaqtida u oddiy dron kabi dvigatellaridan foydalanadi. Leonardo’ning parraklari yurish va harakat vaqtida uning tik turishini kafolatlaydi.
Avvalroq Xitoyda tish qo‘yishga qodir stomatolog-robot, Avstraliyada esa olma terishga qodir robot yaratilgani to‘g‘risida xabar berilgandi.
