Pekin aviatsiya va kosmonavtika universiteti talabalari tomonidan yaratilgan uchuvchisiz boshqariladigan uchish apparati parvoz davomiyligi bo‘yicha jahon rekordini o‘rnatdi, deb xabar beradi “Korrespondent.net”.
Ta’kidlanishicha, “Fen Ju 3-100” nomini olgan droning uzluksiz parvozi 80 soat 46 daqiqa va 35 soniyani tashkil etgan. U Boeing Aurora Flight Sciences kompaniyasi tomonidan yaratilgan uchuvchisiz boshqariladigan uchish apparati — “Orion”ning 2014-yildagi rekordini yangilagan.
Rekord o‘rnatgan parvoz 21-may kuni Xenan provinsiyasi markazidagi Syuchan shahrida amalga oshirilgan. Uchish apparati 300 metr balandlikda aylangan. Parvoz vaqtida yonilg‘i quyish taqiqlangan.
Yaqinda universitet Xalqaro federatsiya aviatsiyasi (FAI) tomonidan jahon rekordi o‘rnatilganini tasdiqlovchi sertifikat topshirilganini ma’lum qilgan.
Xitoy droni mutlaq qora rangga bo‘yalgan. Uning qanotlari uzunligi 10 metrga yetadi. Dron benzin dvigatel yordamida harakatga kelib, og‘irligi to‘liq yonilg‘i quyilgach 60 kilogrammni tashkil etadi. Dron “Xitoy aviatsiyasi otasi” Fen Ju sharafiga nomlangan.
Eslatib o‘tamiz, 2021-yilning martida Kaliforniyadagi Skyfront kompaniyasi tomonidan yaratilgan Perimeter 8 nomli uchuvchisiz boshqariladigan uchish qurilmasi 13 soatdan ortiq parvoz qilib, jahon rekordini o‘rnatgandi.
Mavzuga doir: AQShda dunyodagi eng katta dron yaratildi (video)
Izoh (0)