Deutsche Bank, Landesbank Baden-Wurttemberg va Landesbank Hessen-Thüringen Girozentrale (Helaba) banklari “O‘zbekneftgaz” AJ tasarrufidagi Sho‘rtan gaz-kimyo majmuasining ishlab chiqarish quvvatlarini kengaytirish loyihasida ishtirok etadi.
“O‘zbekiston: Iqtisodiy islohotlar sarhisobi va istiqboli” iqtisodiy forumi doirasida “O‘zbekneftgaz” AJ va Yevropaning uchta yetakchi banki o‘rtasida moliyaviy hamkorlik bo‘yicha muhim shartnomalar imzolangani e’lon qilindi.
“O‘zbekneftgaz” AJ boshqaruvi raisi Mehriddin Abdullayev bir qator yirik banklar vakillari bilan shartnomalarni imzoladi. Jumladan, “Rossiya eksport markazi” AJ vitse-prezident Nikita Gusakov bilan o‘zaro anglashuv memorandumi imzolandi.
Bundan tashqari, “Sho‘rtan gaz kimyo majmuasi ishlab chiqarish quvvatini kengaytirish” loyihasini Euler Hermes (Germaniya) va boshqa Yevropa EKA sug‘urta qoplamalari ostida 300 million yevrogacha miqdorda Helaba banki bilan moliyalashtirish bo‘yicha hamkorlik shartnomasi imzolandi.
“O‘zbekneftgaz” AJ boshqaruvi raisi va savdo va eksportni tizimli moliyalashtirish bo‘yicha Sardor Xolmahmadov hujjatlarni imzolashdi.
Shuningdek, Euler Hermes (Germaniya) va boshqa Yevropa EKA sug‘urta qoplamalari ostida 300 million yevrogacha miqdorda Landesbank Baden-Wurttemberg banki bilan moliyalashtirish bo‘yicha Mehriddin Abdullayev va bankning O‘zbekistondagi bosh vakili Aziz Inomxo‘jayev hamkorlik shartnomasiga imzo chekishdi.
Forum doirasida “O‘zbekneftgaz” AJ va Societe Generale SA banki bilan o‘zaro bilan ham anglashuv memorandumi imzolandi.
Tomonlarning vakillari, ya’ni Societe Generale SA bankining Markaziy Osiyo va Kavkaz mintaqasi bo‘yicha rahbari Guliyeva Teyba va jamiyat boshqaruvi raisi Mehriddin Abdullayev memorandum imzolashdi.
Imzolash marosimidagi so‘nggi kelishuv Euler Hermes (Germaniya) va boshqa Yevropa EKA sug‘urta qoplamalari ostida 500 million yevrogacha miqdorda Deutsche Bank banki bilan bo‘lib o‘tdi.
“Sho‘rtan gaz kimyo majmuasi ishlab chiqarish quvvatini kengaytirish” loyihasini moliyalashtirish bo‘yicha o‘zaro anglashuv memorandumi Deutsche Bank’ning O‘zbekiston va Qozog‘istondagi Igor Vagner va “O‘zbekneftgaz” AJ boshqaruvi raisi tomonidan imzolandi.
Sho‘rtan gaz-kimyo majmuasining (Sho‘rtan GKM kengaytirish loyihasi) ishlab chiqarish quvvatini kengaytirish investitsiya loyihasini moliyalashtirish to‘g‘risidagi hamkorlik shartnomalar 1,1 milliard yevrodan ortiq qiymatda bo‘ldi.
Loyihaning umumiy qiymati 1,8 milliard AQSh dollarga teng bo‘lib, shundan 1,2 milliard AQSh dollari xorijiy banklar va moliya institutlari konsorsiumi, 600 million AQSh dollari esa “O‘zbekneftgaz” AJ tomonidan taqdim etiladi.
Eslatib o‘tamiz, Sho‘rtan gaz-kimyo majmuasining ishlab chiqarish quvvatining kengayishi hisobiga, yiliga qo‘shimcha 280 ming tonna bimodal polietilen, 100 ming tonna polipropilen va 50 ming tonna piroliz distillyatni ishlab chiqarishni ta’minlashga xizmat qiladi. Sintetik suyuq yoqilg‘i ishlab chiqarish zavodida (GTL) ishlab chiqariladigan sintetik nafta majmuaning loyihalashtirilayotgan kengaytirish obyektlari uchun xomashyo bazasi sifatida xizmat qiladi.
“O‘zbekneftgaz” AJ matbuot xizmati
Izoh (0)