Toshkent viloyatidagi o‘rmon xo‘jaligiga qarashli 1 gektar yerni 200 ming dollar evaziga olib berishni va’da qilgan shaxslar ushlandi

Tashkentda fuqaroga 1 gektar yer maydoni olib berishni va’da qilgan shaxslar qo‘lga olindi, deb xabar beradi Bosh prokuratura huzuridagi departament.

Ma’lum qilinishicha, Bosh prokuratura huzuridagi departament hamda DXXning Yunusobod tumani bo‘limlari tomonidan tezkor tadbir o‘tkazilgan. Tadbir davomida S.U. va B.A. ismli shaxslar fuqaro D.ga 200 ming dollar evaziga Toshkent viloyati o‘rmon xo‘jaligi tasarrufidagi 1 gektar yer maydonini vakolatli tanishlari orqali uning nomiga rasmiylashtirib olib berishni va’da qilgani aniqlangan.

Ushbu shaxslar oldindan kelishilgan pulning 10 foizini hisoblab, 20 ming dollarni olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Bo‘stonliqdagi 5 gektar yerni fuqaroga 150 ming dollar evaziga olib berishni va’da qilgan shaxs ushlangani, Toshkentda 40 sotix yer ajratib berish evaziga fuqaroning 40 ming dollarini qo‘lga kiritgan shaxs aniqlangani, Farg‘onada fuqaroga 10 sotix yerni 5500 dollarga olib berishni va’da qilgan qo‘lga olingani to‘g‘risida xabar berilgandi.