Qibrayda 7 gektar yerni 225 ming dollarga sotishga uringan tuman hokimligining sobiq xodimlari ushlandi

Toshkent viloyatining Qibray tumanida ijaraga berilgan yerni o‘zganing nomiga rasmiylashtirib berish evaziga pul talab qilgan shaxslar qo‘lga olindi, deb xabar beradi IIV matbuot xizmati.

Ma’lum qilinishicha, 17-avgust kuni fuqaro N. Yakubova IIVga ariza bilan murojaat qilib, Qibray tumanida yashovchi Abdurashid va Orif ismli shaxslar hokimiyat tomonidan ularga 49 yilga ijaraga berilgan 7 gektar yerni sotib, hokimlikda ishlovchi tanishlari orqali uning nomiga rasmiylashtirib berishga va’da qilganini bildirgan. Buning evaziga ular 225 ming dollar berishini talab qilayotganini aytgan.

18-avgust kuni o‘tkazilgan tezkor tadbirda poytaxtning Yunusobod tumani 19-mavzesidagi Qariyalar oromgohi oldida A.O. ariza muallifi N.Yakubovadan talab qilingan pulning 5 ming dollarini olgan vaqtida ushlangan.

Surishtiruvda aniqlanishicha, A.O. bu pullarni yer egasi T.R.ga berishi kerak bo‘lgan. Tezkor tadbir davom ettirilib, 19-avgust kuni 2011—2018-yillar Qibray tumani hokimiyatida mas’ul lavozimlarda ishlagan T.R. va A.M. tumanning “O‘tkir” mahallasida A.O.dan 5 ming dollarni olgan vaqtida daliliy ashyolar bilan qo‘lga olingan.

Holat bo‘yicha 19-avgust kuni Jinoyat kodeksining 168-moddasi (firibgarlik) 4-qismi “a” bandi va 28, 211-moddasi (jinoyat ishtirokchilarining turlari, pora berish) 3-qismi “a” bandi bilan jinoyat ishi qo‘zg‘atilib, tergov olib borilmoqda.

Avvalroq Farg‘ona, Namangan va Surxondaryoda yerni noqonuniy ravishda sotayotgan shaxslar qo‘lga olingani, DXX Bo‘stonliqda ot sportiga ajratilgan 25,4 gektar yerni 1,5 mln dollarga sotmoqchi bo‘lgan shaxs ushlangani to‘g‘risida xabar berilgandi.