IIV YHXBB ijtimoiy tarmoqlarda tarqalgan Andijon shahrida YPX xodimi “Jiguli”ni quvib, uning YTHga uchrashiga sababchi bo‘lgani aytilgan xabar yuzasidan ma’lumot berdi.
Foto: IIV YHXBB axborot xizmati
Ijtimoiy tarmoqlarda tarqalgan video izohida yozilishicha, Andijon shahrida YPX xodimi davlat raqami 60|560 VSF bo‘lgan Lacetti’da “Jiguli”ni quvib, uning YTHga uchrashiga sabab bo‘lgan va o‘zi voqea joyidan ketib qolgan.
Idora matbuot xizmatining ma’lum qilishicha, yo‘l-transport hodisasi 24-sentabr kuni soat 23:10 larda shaharning Boburshoh ko‘chasidan Oltinko‘l ko‘chasi tomon harakatlanib ketayotgan 22 yoshli A.S. boshqaruvidagi “VAZ-2107” avtomobili bilan sodir bo‘lgan. Haydovchi boshqaruvni yo‘qotib, yo‘lning o‘ng tomoniga chiqib ketgan.
Yo‘l-transport hodisasi oqibatida tan jarohati olganlar yo‘q.
“Ushbu holat ijtimoiy tarmoqlarda yo‘l-patrul xizmati avtomobili haydovchini quvib borgani sabab yuzaga kelgani aytilgan izoh bilan tarqaldi. Holat yuzasidan Andijon viloyati IIB YHXB mas’ullari tomonidan surishtiruvlar olib borilganida, YPX xodimi O.Soliyev o‘ziga biriktirilgan Lacetti rusumli xizmat avtomobilida ushbu avariya sodir bo‘lgan vaqtda mazkur ko‘chada harakatlangani, haydovchi A.S. boshqaruvidagi avtomobil ishtirokidagi YTHga aloqador emasligi ma’lum bo‘ldi”, — deyiladi xabarda.
Shuningdek, “Jiguli” haydovchisi ham sodir bo‘lgan voqea bo‘yicha izoh bergan.
“Texnik nosozlik sabab rul boshqaruvini yo‘qotib, ‘O‘zbegim’ savdo markazi yaqinida yo‘l chetiga chiqib ketib qoldim. Menga va yonimdagi sherigimga hech qanday shikast yetgani yo‘q. Kecha ijtimoiy tarmoqlarda ‘GAI xodimlari quvlabdi, qisibdi’ deya tarqalgan gaplar yolg‘on. Bu ma’lumotlarning hammasi noto‘g‘ri. Shularga to‘g‘ri baho berishlaringni so‘rayman”, — deydi haydovchi.
Idora matbuot xizmati ijtimoiy tarmoqdagi ayrim sahifalar egalaridan, har qanday ma’lumotni batafsil o‘rganmasdan turli izohlar bilan tarqatmaslikni so‘ragan.
Avvalroq Surxondaryoda mast haydovchi Lacetti’da ikki YPX inspektorini sudrab ketgani to‘g‘risida xabar berilgandi.
