Surxondaryoda mast holatda Lacetti avtomobilini boshqarib, YPX inspektorlaridan qochib ketishga uringan haydovchiga chora ko‘rildi. Bu haqda viloyat IIB YHXB axborot xizmati xabar berdi.
Kadr: Telegram
Ma’lum qilinishicha, 19-sentabr kuni soat 21:25 larda Surxondaryo viloyati Qumqo‘rg‘on tumani “Surxon sohili” mahallasida xizmat olib borayotgan viloyat IIB YHXB YPXO 4-safarbar guruh inspektorlari Lacetti haydovchisining holatini aniqlash maqsadida to‘xtatgan.
Haydovchi inspektorlarning qonuniy talabini bajarmay, qochib ketishga harakat qilgan.
Oldindan ko‘rilgan xavfsizlik choralari sababli haydovchi avtomashina rulidan tushirib olingan va Qumqo‘rg‘on tumani Tibbiyot birlashmasiga olib borilib, mastligi yoki mast emasligini aniqlash maqsadida tibbiy tekshiruvidan o‘tkazilgan.
Tibbiy tekshiruv xulosasiga ko‘ra, 1977-yilda tug‘ilgan haydovchi alkogoldan mast holda ekani tasdiqlangan. Haydovchi T.Sh. Qumqo‘rg‘on tumani IIBga olib borilib, unga nisbatan YPX inspektori tomonidan Ma’muriy javobgarlik to‘g‘risidagi kodeksning 131-moddasi bilan bayonnoma rasmiylashtirilib, transport vositasi vaqtincha saqlash uchun jarima maydoniga joylashtirilgan.
Hozirda haydovchining sodir etgan huquqbuzarligiga oid materiallar jinoyat ishlari bo‘yicha Qumqo‘rg‘on tuman sudiga yuborilgan.
Avvalroq Toshkentda 4 nafar YPX xodimi haydovchini urgani aytilgan xabar yuzasidan xizmat tekshiruvi yakunlangani, Toshkentda mast holda deb gumon qilgani uchun mashina boshqarishga yo‘l qo‘ymagan YPX xodimini haqoratlagan ayolga jazo belgilangani, Chiroqchida profilaktika inspektorining xizmat kiyimini tortib yirtib, unga tan jarohati yetkazgan shaxsga jinoyat ishi qo‘zg‘atilgani to‘g‘risida xabar berilgandi.
