Dunyo va o‘zbek sportiga oid 24-sentabr kunining eng muhim xabarlari dayjesti bilan tanishing.
O‘zbekiston
Superliga 20-turining to‘rtta o‘yinida VAR ishlaydiO‘zbekiston chempionatining 20-tur uchrashuvlari 25—27-sentabr kunlari bo‘lib o‘tadi. PFL 20-tur bahslarida faoliyat yuritadigan hakamlar ro‘yxatini e’lon qildi. Mazkur turning to‘rtta o‘yinida VAR tizimi ishlaydi: “Paxtakor”—“Turon”, “OKMK”—“Surxon”, “Nasaf”—“Navbahor”, “Lokomotiv”—“Mash’al”.
Jahon
Mourinyoda rekord, “Roma” yetakchisi derbini o‘tkazib yuboradi
Hafta o‘rtasida Yevropaning qator ligalarida navbatdagi tur o‘yinlari o‘tkazildi. “Roma” o‘z uyida “Udineze”ni minimal hisobda taslim etdi. Uchrashuvda Eldor Shomurodov so‘nggi daqiqalarda maydonga tushdi. Mazkur bahsda rimliklar sardori Lorenso Pellegrini qizil kartochka oldi va jamoa yetakchisi keyingi turdan o‘rin olgan “Latsio”ga qarshi derbini o‘tkazib yuboradi.
Joze Mourinyo A Seriyada qatorasiga 41 uy o‘yinidan beri yutqazmayapti. Bu ko‘rsatkich uch ochkolik tizimdagi (1994/95) rekord natija hisoblanadi. Massimiliano Allegri 2015—2017-yillarda “Yuventus” boshqaruvida shunday ko‘rsatkich qayd etgan. Mourinyo ushbu mavsumdan “Roma”ni boshqarmoqda. Ungacha mutaxassis 2008—2010-yillarda “Inter”da ishlagan.
“Barselona”ning muvaffaqiyatsiz seriyasi davom etadi
“Barselona” La Liga 6-turi doirasida “Kadis”ga qarshi kechgan bahsda nursiz durang qayd etdi va g‘alabasiz seriyasini (1 mag‘lubiyat, 2 durang) uchta o‘yinga yetkazdi. Bitta zaxira o‘yiniga ega katalonlar yetakchi “Real”dan 7 ochkoga ortda qolmoqda.
O‘yindan avval “Barselona” prezidenti Ronald Kumanga ishonishi, biroq “Kadis”ga qarshi o‘yin uning uchun so‘nggi imkon ekani haqida aytgandi. “Ko‘k-anorranglilar” keyingi bahsni yakshanba kuni “Levante”ga qarshi o‘tkazadi. Jamoa kelasi haftadagi o‘yinini boshqa murabbiy qo‘l ostida o‘tkazishi ehtimoli yo‘q emas. Biroq, Marca versiyasiga ko‘ra, “Barselona” hali-beri Kumanni bo‘shatish niyatida emas va keyingi uch o‘yin uning uchun so‘nggi imkoniyat bo‘ladi. Katalonlarni “Levante”, “Benfika” va “Atalanta”ga qarshi o‘yinlar kutib turibdi.
Kilian Mbappe Ibrahimovichning rekordini yangiladi
“PSJ”ning 22 yoshli forvardi Fransiya chempionatida avgust oyining eng yaxshi o‘yinchisi deb topildi. Shu tariqa Mbappe faoliyati davomida oltinchi marta ushbu sovrinni qo‘lga kiritdi va Zlatan Ibrahimovichning rekordini yangiladi. Parijliklar sobiq hujumchisi besh marta oyning eng yaxshisi bo‘lgandi.
Mbappe avgust oyida Liga 1 da 4 ta o‘yin o‘tkazib, uchta gol va bitta golli uzatma muallifiga aylandi.
Messi “PSJ”ning navbatdagi o‘yinini o‘tkazib yuboradi
Parijliklar hujumchisi tizzasidagi jarohatini tiklashda davom etmoqda. Le Parisien xabariga ko‘ra, Messi hafta oxirida to‘p bilan mashg‘ulotlarga kirishadi.
“PSJ” Messini “Monpelye”ga qarshi o‘yin qaydnomasiga kiritmadi. Qayd etilishicha, 34 yoshli futbolchi 28-sentabr kuni YChL doirasida “Manchester Siti”ga qarshi kechadigan uchrashuvda maydonga tushishi mumkin.
Antonio Ryudiger “Bavariya”ga yo‘l olishi mumkin
2022-yilning yozida erkin agentga aylanadigan “Chelsi” markaziy himoyachiga bo‘lgan qiziqish ortib bormoqda. 28 yoshli germaniyalik futbolchiga “Bavariya”dan qiziqish bor. Ryudigerning o‘zi ham Myunxenga yo‘l olishga qarshi emas, deya xabar qiladi Bild.
“Chelsi” himoyachi bilan shartnomani uzaytirmoqchi va unga yiliga 8,5 million yevro maosh taklif qilyapti. Antonio esa 10 million talab qilmoqda.
“PSJ”da navbatdagi mojaro
Parijliklar darvozaboni Janluiji Donnarumma yetarli o‘yin amaliyotiga ega bo‘lolmayotganidan norozi, deya xabar qilmoqda Corriere della Sera. Jiji Keylor Navas bilan yuzaga keladigan jiddiy raqobatni kutgan, biroq zaxira o‘rindig‘ida bu qadar ko‘p qolib ketishga tayyor bo‘lmagan.
Qayd etilishicha, “PSJ” ustozi Maurisio Pochettino Donnarummani asosiy tarkibga kiritishga qiynalmoqda. Chunki Navasni Lionel Messi, Anxel di Mariya, Neymar, Markinyos va Leandro Paredes kabi lotinamerikalik futbolchilar qo‘llab-quvvatlamoqda.
Donnarummani olib kelish qarori “PSJ” sport direktori Leonardoga tegishli. Italiyalik funksioner yulduz posbonni tekinga qo‘lga kiritish imkoniyatini yo‘qotishni istamagandi.
Donnarumma Fransiya chempionatining 7-turiga kelib bor-yo‘g‘i ikkita o‘yinda maydonga tushdi.
Izoh (0)