Дунё ва ўзбек спортига оид 24 сентябрь кунининг энг муҳим хабарлари дайжести билан танишинг.
Ўзбекистон
Суперлига 20-турининг тўртта ўйинида VAR ишлайдиЎзбекистон чемпионатининг 20-тур учрашувлари 25—27 сентябрь кунлари бўлиб ўтади. ПФЛ 20-тур баҳсларида фаолият юритадиган ҳакамлар рўйхатини эълон қилди. Мазкур турнинг тўртта ўйинида VAR тизими ишлайди: «Пахтакор»—«Турон», «ОКМК»—«Сурхон», «Насаф»—«Навбаҳор», «Локомотив»—«Машъал».
Жаҳон
Моуриньода рекорд, «Рома» етакчиси дербини ўтказиб юборади
Ҳафта ўртасида Европанинг қатор лигаларида навбатдаги тур ўйинлари ўтказилди. «Рома» ўз уйида «Удинезе»ни минимал ҳисобда таслим этди. Учрашувда Элдор Шомуродов сўнгги дақиқаларда майдонга тушди. Мазкур баҳсда римликлар сардори Лоренцо Пеллегрини қизил карточка олди ва жамоа етакчиси кейинги турдан ўрин олган «Лацио»га қарши дербини ўтказиб юборади.
Жозе Моуриньо А Серияда қаторасига 41 уй ўйинидан бери ютқазмаяпти. Бу кўрсаткич уч очколик тизимдаги (1994/95) рекорд натижа ҳисобланади. Массимилиано Аллегри 2015—2017 йилларда «Ювентус» бошқарувида шундай кўрсаткич қайд этган. Моуриньо ушбу мавсумдан «Рома»ни бошқармоқда. Унгача мутахассис 2008—2010 йилларда «Интер»да ишлаган.
«Барселона»нинг муваффақиятсиз серияси давом этади
«Барселона» Ла Лига 6-тури доирасида «Кадис»га қарши кечган баҳсда нурсиз дуранг қайд этди ва ғалабасиз сериясини (1 мағлубият, 2 дуранг) учта ўйинга етказди. Битта захира ўйинига эга каталонлар етакчи «Реал»дан 7 очкога ортда қолмоқда.
Ўйиндан аввал «Барселона» президенти Рональд Куманга ишониши, бироқ «Кадис»га қарши ўйин унинг учун сўнгги имкон экани ҳақида айтганди. «Кўк-анорранглилар» кейинги баҳсни якшанба куни «Леванте»га қарши ўтказади. Жамоа келаси ҳафтадаги ўйинини бошқа мураббий қўл остида ўтказиши эҳтимоли йўқ эмас. Бироқ, Marca версиясига кўра, «Барселона» ҳали-бери Куманни бўшатиш ниятида эмас ва кейинги уч ўйин унинг учун сўнгги имконият бўлади. Каталонларни «Леванте», «Бенфика» ва «Аталанта»га қарши ўйинлар кутиб турибди.
Килиан Мбаппе Ибраҳимовичнинг рекордини янгилади
«ПСЖ»нинг 22 ёшли форварди Франция чемпионатида август ойининг энг яхши ўйинчиси деб топилди. Шу тариқа Мбаппе фаолияти давомида олтинчи марта ушбу совринни қўлга киритди ва Златан Ибраҳимовичнинг рекордини янгилади. Парижликлар собиқ ҳужумчиси беш марта ойнинг энг яхшиси бўлганди.
Мбаппе август ойида Лига 1 да 4 та ўйин ўтказиб, учта гол ва битта голли узатма муаллифига айланди.
Месси «ПСЖ»нинг навбатдаги ўйинини ўтказиб юборади
Парижликлар ҳужумчиси тиззасидаги жароҳатини тиклашда давом этмоқда. Le Parisien хабарига кўра, Месси ҳафта охирида тўп билан машғулотларга киришади.
«ПСЖ» Мессини «Монпелье»га қарши ўйин қайдномасига киритмади. Қайд этилишича, 34 ёшли футболчи 28 сентябрь куни ЕЧЛ доирасида «Манчестер Сити»га қарши кечадиган учрашувда майдонга тушиши мумкин.
Антонио Рюдигер «Бавария»га йўл олиши мумкин
2022 йилнинг ёзида эркин агентга айланадиган «Челси» марказий ҳимоячига бўлган қизиқиш ортиб бормоқда. 28 ёшли германиялик футболчига «Бавария»дан қизиқиш бор. Рюдигернинг ўзи ҳам Мюнхенга йўл олишга қарши эмас, дея хабар қилади Bild.
«Челси» ҳимоячи билан шартномани узайтирмоқчи ва унга йилига 8,5 миллион евро маош таклиф қиляпти. Антонио эса 10 миллион талаб қилмоқда.
«ПСЖ»да навбатдаги можаро
Парижликлар дарвозабони Жанлуижи Доннарумма етарли ўйин амалиётига эга бўлолмаётганидан норози, дея хабар қилмоқда Corriere della Sera. Жижи Кейлор Навас билан юзага келадиган жиддий рақобатни кутган, бироқ захира ўриндиғида бу қадар кўп қолиб кетишга тайёр бўлмаган.
Қайд этилишича, «ПСЖ» устози Маурисио Почеттино Доннаруммани асосий таркибга киритишга қийналмоқда. Чунки Навасни Лионель Месси, Анхель ди Мария, Неймар, Маркиньос ва Леандро Паредес каби лотинамерикалик футболчилар қўллаб-қувватламоқда.
Доннаруммани олиб келиш қарори «ПСЖ» спорт директори Леонардога тегишли. Италиялик функционер юлдуз посбонни текинга қўлга киритиш имкониятини йўқотишни истамаганди.
Доннарумма Франция чемпионатининг 7-турига келиб бор-йўғи иккита ўйинда майдонга тушди.
Изоҳ (0)