Karim Benzema — Yevropaning ayni damdagi eng yaxshi futbolchisi. U joriy mavsumda “Yuventus” va “Arsenal”dan ko‘proq, “Barselona” bilan esa bir xil gol urdi

“Real” hujumchisi Karim Benzema ayni paytda Yevropaning eng yaxshi futbolchisi bo‘lib turibdi. Fransiyalik hujumchi La Liganing 6-turidan o‘rin olgan “Malyorka”ga qarshi o‘yinda jamoasining 4 ta (2 ta gol va 2 golli uzatma) golida qatnashdi va “gol+pas” tizimida 15 ochko to‘plab, top-5 ligalarning XXI asrdagi rekordini yangiladi. Mavsum boshidagi oltita turda hali hech qaysi futbolchi bunchalik ko‘p golda qatnashmagan. Benzemaning hisobida hozirda 8 ta gol va 7 ta golli uzatma bor. Aql bovar qilmas ko‘rsatkich, shunday emasmi, ammo bu raqamlar boshqalari bilan solishtirilib ko‘rilganda yanada “jozibaliroq” ko‘rinadi.

Misol uchun, La Liga tarixida 6-turdan so‘ng “gol+pas” tizimi bo‘yicha eng yaxshi ko‘rsatkich qayd etgan futbolchilar keltiriladi:

• Karim Benzema (2021/22-yilgi mavsum) — 15 (8 gol, 7 ta golli uzatma);
• Krishtianu Ronaldu (2014/15-yilgi mavsum) — 14 (13 ta gol, 1 ta golli uzatma);
• Lionel Messi (2011/12-yilgi mavsum) — 13 (8 ta gol, 5 ta golli uzatma).

33 yoshli Karimning natijasini to‘liq anglab yetish uchun, uning 29 yoshli Ronaldu va 24 yoshli Messini ortda qoldirganini ko‘rsatish kifoya qilsa kerak.

Bundan tashqari, Benzema ushbu mavsumda ba’zi klublardan ham ko‘proq gol urdi:

• “Yuventus” — 7 ta;
• “Tottenhem” — 3 ta;
• “Arsenal” — 2 ta;
• “Barselona” esa Benzema bilan bir xil ko‘rsatkich qayd etgan — 8 ta.

Umuman olganda, Karimning yoshi (u dekabrda 34 yoshga to‘ladi) — unchalik ham mashhur bo‘lmagan mavzu hisoblanadi. Odatda 30 yoshdan keyin Ronaldu, Zlatan Ibrahimovich va Antonio di Natale kabi futbolchilarning zo‘r o‘ynayotgani haqida gapiriladi, ammo Benzema deyarli hech qachon “yillar o‘tgani sari yaxshilanib bormoqda” klubi a’zolari qatorida tilga olinmagan.

Misol tariqasida, bir qancha jahon darajasidagi yulduzlar Benzemaning yoshida grand klublar safida o‘ynamagan ham:

• Robin van Persi 33 yoshida “Fenerbahche”da o‘ynagan;
• Fernando Torres 33 yoshida “Atletiko”da faoliyatini yakunlash haqida o‘ylayotgandi;
• Ueyn Runi 33 yoshda MLS’da to‘p surgan.

Shu bilan birga alohida ta’kidlash kerak bo‘lgan yana bir jihat bor, Benzema tez-tez jarohat olib turadi. Uzoq muddatga safdan chiqaradigan darajada bo‘lmasa-da, lekin juda ko‘p marotaba turli xil mayda shikastlanishlar bo‘lgan. Ushbu jarohatlar tufayli (Transfermarkt ma’lumotlariga ko‘ra) Benzema 2011-yildan beri 54 o‘yinni o‘tkazib yuborgan. O‘yinlar sonini inobatga olib aytganda, buni bir mavsumga tenglashtirish mumkin.

Benzema haqida gap ketganda yana bir muhim jihat bor — bu uning uning ko‘p yillar Ronaldu bilan birga o‘ynagani. Ko‘pchilik Karimni Ronalduning samaradorligi uchun uning soyasida qolib ketgan deb hisoblaydi.

Ushbu fikrlar qanchalik asosli ekanligini tekshirish uchun Benzemaning Ronaldu bilan birga o‘ynagan mavsumlardagi statistikasiga murojaat qilish kerak bo‘ladi (faqat La Liga):

• 2009/10-yilgi mavsum — 27 o‘yin, 8 ta gol, 5 ta golli uzatma (debyut mavsum);
• 2010/11 — 33 o‘yin, 15 ta gol, 6 ta golli uzatma;
• 11/12 — 34 o‘yin, 21 ta gol, 11 ta golli uzatma;
• 12/13 — 30 o‘yin, 11 ta gol, 13 ta golli uzatma;
• 13/14 — 35 o‘yin, 17 ta gol, 10 ta golli uzatma;
• 14/15 — 29 o‘yin, 15 ta gol, 11 ta golli uzatma;
• 15/16 — 27 o‘yin, 24 ta gol, 8 ta golli uzatma;
• 16/17 — 29 o‘yin, 11 ta gol, 5 ta golli uzatma;
• 17/18 — 32 o‘yin, 5 ta gol, 11 ta golli uzatma.

Ko‘rish mumkinki, Benzemaning “Real”dagi eng sermahsul mavsumi Ronaldu bilan birga o‘ynagan vaqtga to‘g‘ri keladi — 2015/16-yilgi mavsumda 32 ta samarali harakat.

Karim hali ham ushbu natijasini yangilay olganicha yo‘q. U o‘tgan mavsumda buni takrorladi (23+9), ammo 7 ta ko‘proq o‘yin o‘tkazgan holda.

Ronalduning gol urish borasidagi xudbinligi qurboni sifatida ko‘riladigan futbolchi uchun bu yomon statistika emas. Agar Benzema shu ketishda davom etsa, “Real”dagi natijasini takrorlaydi, balki “Oltin butsi” va “Oltin to‘p” uchun ham kurashishi mumkin.