Qo‘ylar sabab uyini o‘zgartirgan Ronaldu, O‘FA rahbarligiga nomzodlar va 40 nafar qolgan Golden Boy—2021 ga da’vogarlar. Eng so‘nggi sport yangiliklari

Dunyo va o‘zbek sportiga oid 16-sentabr kunining eng muhim xabarlari dayjesti bilan tanishing.

O‘zbekiston

O‘FA prezident va vitse-prezidentlikka nomzodlar ro‘yxatini e’lon qildi

25-sentabr kuni MOQ anjumanlar zalida O‘FAning navbatdagi Hisobot-saylov Kongressi bo‘lib o‘tadi. Tashkilot rahbarligiga nomzodlar ro‘yxati e’lon qilindi.

O‘FA prezidentligi va vitse-prezidentligi lavozimiga faqat bir nafardan nomzod ko‘rsatilgan. Quyidagi nomzodlar ro‘yxati bilan tanishing:

O‘zbekiston tennischilari Devis Kubogida Norvegiya terma jamoasiga qarshi bahs olib boradi

O‘zbekiston tennis terma jamoasi 17-sentabr kuni Norvegiyaning Oslo shahrida Devis Kubogi doirasida bahslarga kirishadi. Norvegiyaga Farrux Do‘stov, Denis Istomin, Humoyun Sultonov, Sanjar Fayziyev, Sergey Fomin va Maksim Shin kabi o‘zbekistonlik sportchilar yo‘l olgan. O‘zbekiston ushbu bahsda g‘olib chiqadigan bo‘lsa musobaqaning 1-guruh bahslariga yo‘llanma oladi.

Jahon

Yevropa Chempionlar Ligasining 1-turidan o‘rin olgan o‘yinlar 14—15-sentabr kunlari bo‘lib o‘tdi. UEFA tur yakunlari bo‘yicha haftaning eng yaxshi o‘yinchisi nomiga da’vogarlar ro‘yxatini va tur ramziy terma jamoasini e’lon qildi.

• Jud Bellinghem (“Borussiya D”) — “Beshiktosh”ga qarshi o‘yinda (2:1) gol va assist;
• Sebastyan Aller (“Ayaks”) — “Sporting”ga qarshi bahsda (5:1) 4 ta gol;
• Kristofer Nkunku (“Leypsig”) — “Manchester Siti” bilan uchrashuvda (3:6) het-trik;
• Robert Levandovski (“Bavariya”) — “Barselona”ga qarshi bellashuvda (3:0) dubl.

Ronaldu qo‘ylar shovqini sabab uyini almashtirdi

36 yoshli futbolchi “Manchester Yunayted”ga qaytganidan keyin unga 6 million funtlik koshona taqdim etilgandi. Biroq Ronaldu va uning oilasi bir haftadan keyin u yerdan ko‘chishga qaror qildi. Uy tabiati chiroyli va yashil hududda joylashgani bilan atrofda qo‘ylar saqlanadigan joy bor. Qo‘ylarning ertalabki shovqini dam olish rejimiga qat’iy amal qiladigan Ronalduga yoqmagan. Shu sabab futbolchi boshqa xonadon topib berilgan.

Krishtianuning yangi uyi Cheshirda joylashgan. Unda basseyn, kinozal va to‘rtta avtomobilga mo‘ljallangan garaj bor. Ronaldu “Manchester Yunayted”dagi dastlabki faoliyatida shu tumanda yashagandi.

Golden Boy—2021 sovriniga da’vogarlar top-40 ligini e’lon qilindi

Tuttosport nashri yilning eng yaxshi yosh o‘yinchisiga topshiriladigan sovringa nomzodlar ro‘yxatini e’lon qildi.

Undan bir qator nomdor futbolchilar joy oldi: Jud Bellinghem, Jovanni Reyna (ikkisi – “Borussiya D”), Miron Boadyu (“Monako”), Eduardo Kamavinga (“Real”), Sharl de Ketelare (“Bryugge”), Erik Garsiya (“Barselona”), Rayan Gravenberx (“Ayaks”), Meyson Grinvud (“Man Yunayted”), Ilaysh Moriba, Yoshko Gvardiol (ikkisi – “Leypsig”), Gabriel Martinelli (“Arsenal”), Jamal Musiala (“Bavariya”), Nunu Mendesh (“PSJ”), Pedri (“Barselona”), Bukayo Saka (“Arsenal”), Florian Virts (“Bayer”).

G‘olib nomi noyabr oyida e’lon qilinadi. O‘tgan yili Erling Holand g‘olib bo‘lgandi.

“Bavariya” Goretskani olib qolishni uddaladi

Myunxenliklar yarim himoyachi Leon Goretska bilan amaldagi shartnomani 2026-yilning yoziga qadar uzaytirdi. Germaniyalik futbolchining hozirgi kelishuvi 2022-yil yozigacha mo‘ljallangandi.

Avvalroq Goretskani keyingi yili tekinga qo‘lga kiritish uchun “Real” va “Manchester Yunayted” kabi jamoalar kurash olib borayotgani xabar qilingandi.

“PSJ” mashhur triosi birga maydonga tushdi, Mbappe jarohat oldi

Chempionlar Ligasi doirasida kechgan “Bryugge”ga qarshi o‘yinda parijliklar hujum uchligi — Neymar-Messi-Mbappe asosiy tarkibda maydonga tushdi. Biroq futbolchilarning birgalikdagi dastlabki o‘yini muvaffaqiyatli chiqmadi. Uchrashuvda 1:1 hisobi qayd etildi. Bundan tashqari ikkinchi bo‘lim debyutida Kilian boldir suyagi bilan tovon suyagani biriktiruvchi bo‘g‘inini shikastlab oldi. Hozircha jarohatning qay darajada jiddiy ekani noma’lum.