“Karyera uchun muhabbatimni qurbon qildim”. Model Naomi Kempbell ona bo‘lgani va shaxsiy hayoti haqida so‘zlab berdi

Supermodel Naomi Kempbell kamdan kam hollarda shaxsiy hayoti tafsilotlari bilan bo‘lishadi. Ma’lum bo‘lishicha, Naomi  yaqinda ona bo‘lgan, ammo hali ham qizining yuzini, hatto ismini ham oshkor qilmagan.

Model The Cut nashriga bergan intervyusida o‘zining karyerasi, yaqinlari bilan bo‘lgan munosabatlari, shon-shuhrat yo‘lida boshidan kechirgan qiyinchiliklari va onalik haqida gapirib berdi:

“Men karyera uchun muhabbatimni qurbon qildim. Afsuski, meni tushunadigan umr yo‘ldoshini topmadim. Bilasizmi, men juda kuchliman, lekin ayni paytda o‘ta ta’sirchanman ham. Bilaman, bu kabi munosabatlarda murosa qilish kerak”, — deydi model. U, shuningdek, o‘zining oldingi qo‘rquvlarini yengishga muvaffaq bo‘lganini va kuchli bo‘lishga intilayotganini aytib o‘tgan.

“Endi esa o‘zimga ko‘zgudan qarash qiyin emas. Yoshligimda har doim ham o‘zimni to‘g‘ri tutmaganman. Shuning uchun ham ko‘p narsani o‘rganishimga to‘g‘ri keldi”, — deydi yulduz. Shuningdek, u hozirda atrofida mehribon odamlar bilan qurshalganini, shu jumladan, onasi ham unga surrogat onadan tug‘ilgan qizini tarbiyalashda yordam berayotganini ma’lum qildi.