Toshkentda YPX xodimlaridan qochishga uringan Spark haydovchisi ushlandi. Mashina salonidan giyohvand vositaga o‘xshash modda topilgan

IIV YHXBB ijtimoiy tarmoqlarda YPX xodimidan qochib ketishga uringan fuqaro ushlangani tasvirlangan video yuzasidan ma’lumot berdi.

Ma’lum qilinishicha, 29-avgust kuni soat 23:30 larda Chilonzor tumani Bunyodkor ko‘chasida YPX xodimlari O.Turg‘unov hamda O.Ismoilov tomonidan Spark rusumli avtomobil to‘xtatilgan. Tekshiruv davomida 1991-yilda tug‘ilgan A.K. ismli haydovchi shubhali xatti-harakatlar bilan voqea joyidan piyoda qochib, xodimlarning qonuniy talabini bajarmagan. Ko‘rilgan choralar natijasida haydovchi ushlangan.

Xolislar va guvohlar ishtirokida avtomobil ko‘zdan kechirilganda salon qismida sellofan paketda oq rangli, kukunsimon, o‘tkir hidli giyohvandlik vositasiga o‘xshash modda borligi aniqlanib, tegishli tartibda hujjatlar rasmiylashtirilgan.

Holat to‘liq o‘rganib chiqishlik uchun haydovchi va topilgan vositalar tuman IIO FMBga topshirilgan.

Avvalroq Chiroqchida profilaktika inspektorining xizmat kiyimini tortib yirtib, unga tan jarohati yetkazgan shaxsga jinoyat ishi qo‘zg‘atilgani, Toshkentda garajining buzilishiga qarshilik ko‘rsatgan ayolga qo‘pol munosabatda bo‘lgan IIB xodimiga xizmat tekshiruvi tayinlangani to‘g‘risida xabar berilgandi.