Kobul xalqaro aeroporti yaqinida portlash sodir bo‘ldi. Ushbu axborotni Pentagon vakili Jon Kirbi tasdiqlagan, deb yozmoqda Meduza.

Foto: AP Photo

“Biz Kobul aerporti yaqinida portlash sodir bo‘lganini tasdiqlaymiz. Hodisa oqibatida halok bo‘lganlar soni hozircha noma’lum”,— deya yozgan Jon Kirbi Twitter’dagi sahifasida.

Keyinchalik “Tolibon” harakati vakili terakt oqibatida 11 kishining halok bo‘lganini ma’lum qilgan.

Pajhwok agentligi bergan xabarga ko‘ra, hodisa oqibatida ikki kishi halok bo‘lgan. Al Jazeera telekanali xavfsizlik xizmatidagi manbasiga tayanib, portlash tufayli kamida 15 nafar odamga jarohat yetganini aniqlagan.

The Wall Street Journal axborotiga ko‘ra, portlashdan keyin amerikalik askarlarga ham talafot yetgan.

Reuters agentligi axboroti bo‘yicha aeroportga shimol tomondan kirish yo‘lida hudkush terrorchi o‘zini o‘zi portlatgan. Al Jazeera agentligi portlashdan keyin aeroport hududida otishma ovozlari eshitilganini yozgan, Turkiya Mudofaa vazirligi axborotida esa aeroport yaqinida bir emas, ikkita portlash yuz bergani aytiladi. Sky News Britaniya Mudofaa vazirligiga asoslanib bergan xabarga ko‘ra, Kobuldagi ikkinchi portlash bomba o‘rnatilgan avtomobil vositasida amalga oshirilgan.

Foto: Sky News

Foto: Sky News 

Foto: Sky News

Fox News kamida uch nafar AQSh harbiysi portlash oqibatida jarohat olganligi haqida xabar bergan. Bu “Tolibon” harakati mamlakatda hokimiyat tepasiga kelganidan keyin yuz bergan birinchi terakt.

Portlash oqibatida jarohat olgan fuqarolar kasalxonalarga kiritilmoqda.

Foto: Reuters

Ayni vaqtda Kobul aeroporti — Afg‘onistondan boshqa yerga uchib ketish mumkin bo‘lgan yagona joy. “Tolibon” harakati 15-avgust kuni mamlakatda o‘z hukmronligini o‘rnatganidan keyin aeroport hududiga minglab odamlar kelgan va ular xorijlik diplomatlar, chet el fuqarolarini evakuatsiya qilayotgan samolyotlarda Afg‘onistondan qochib ketishga urinmoqda.

Avval G‘arb razvedka xizmatlari IShID hudkushlarining Kobulda teraktlar uyushtirishi mumkinligi haqida ogohlantirgandi. “Tolibon” harakati vakili ham IShID terrorchilari tomonidan hujumlar bo‘lishi mumkinligi haqida gapirgan.