Gonkong hukumati mamlakatga uchib kelgan Nikol Kidmanga o‘zini o‘zi yakkalash rejimiga rioya qilmaslikka ruxsat berdi. Suratga olish ishlari uchun uchib kelgan aktrisa “belgilangan professional ishi”ni bajarishi uchun istisno qo‘llanilgan, deb xabar beradi Esquire.
Xorijdan Gonkongga uchib kelgan fuqarolar maxsus mehmonxonalarda 7-21 kun o‘zini o‘zi yakkalashi kerak. Ushbu talab ham xorijliklar, ham mahalliy aholiga taalluqli. Biroq hukumat Amazon striming-servisi tomonidan qo‘llab-quvvatlanayotgan “Ekspatlar” serialining suratga olish guruhi, Kidman va boshqa aktyorlarning ishtiroki Gonkong iqtisodiyotini qo‘llab-quvvatlayapti deb hisoblagan.
Reuters’ning yozishicha, ko‘plab fuqarolar hukumatning bu kabi qaroridan norozi bo‘lmoqda. Ijtimoiy tarmoqlarda foydalanuvchilar koronavirusga qarshi qattiq cheklovlar sabab ular deyarli ikki yildan buyon xorijdagi qarindoshlarini ko‘rgani bora olmayotganini yozmoqda.
Gonkong hukumati 15 ta davlatni, xususan, AQSh, Fransiya va Ispaniyani koronavirus keng tarqalgan davlatlar ro‘yxatiga qo‘shgan. Ushbu davlatlardan Gonkongga faqat emlangan fuqarolar kela oladi. Shu sababli ko‘plar insonlar chiptalarini almashtirishga yoki topshirishga, shuningdek, mehmonxonalarni 21 kunga bronlashga majbur bo‘lgan.
Izoh (0)