Rossiyaning “Metrovagonmash”da Toshkent metropoliteni uchun maxsus ishlab chiqarilgan 20 ta yangi vagon 20-avgust kuni Toshkentga yuborildi. Bu haqda “O‘zbekiston temir yo‘llari” axborot xizmati xabar qildi.
Qayd etilishicha, ularda 5 ta metro-poyezd tashkil etiladi. Harakat tarkibining yangi partiyasi avgust oyining oxirida yetkazib berilishi ko‘zda tutilgan.
Umumiy hisobda Toshkent metrosiga Rossiyadan 10 ta poyezd keltirilishi rejalashtirilgan.
Keltiriladigan poyezdda vagonlar orqali erkin harakatlanish mumkin. Bosh vagonlarda nogironlar aravachasi uchun joylar mavjud. Har bir yo‘lovchilar bo‘linmasi bekatni qidirish, yo‘nalishni rejalashtirish va yo‘l vaqtini hisoblash uchun interaktiv qidirish qobiliyatiga ega sensor ekranli axborot monitorlari bilan jihozlangan.
Yo‘lovchi salonlari va haydovchi kabinalari videokuzatuv, konditsioner va havoni zararsizlantirish tizimlari bilan jihozlangan. Metro vagonlari va romlarining ishlash muddati 30 yil. Haydovchilar kabinasining old oynasi, bir qismi yer yuzida harakatlanadigan Toshkent metrosining o‘ziga xos xususiyatlarini inobatga olgan holda, qo‘lda sozlanishi mumkin bo‘lgan quyosh nurlaridan himoya qiluvchi tizim bilan ta’minlanadi.
Izoh (0)