Қашқадарёлик тадбиркор вилоят ҳокими Зоир Мирзаев ваъдасини бажармаётганини айтмоқда

Қашқадарё вилоятининг Деҳқонобод туманида яшовчи тадбиркор Бекзод Бердиев вилоят ҳокими Зоир Мирзаев 2019 йил 31 декабрь куни берган ваъдасини бажармаётганини айтмоқда. Бу ҳақда «Дарё» таҳририятига шикоят қилган тадбиркор вилоят ҳокими томонидан берилган ваъда — Деҳқонобод туманининг Бойқўрғон қишлоғида қайта қурилган бозорнинг эгалик ҳуқуқи сотувга қўйилиши ҳақидаги гап гаплигича қолаётганини айтди.

«Қишлоғимиздаги бозор муаммоси сайтда ёритилгач, 2019 йил 31 декабрь куни вилоят ҳокими Зоир Мирзаев Деҳқонобод туманига борганди. Ҳоким қишлоқда мен раҳбарлик қилаётган ‘Бойқўрғон беклиги’ деҳқон озиқ-овқат бозорини, шунингдек бизга рақобатчи ‘Турсунхон Бибизулайҳo’ деҳқон озиқ-овқат бозорида яратилган шарт-шароитни кўриб, ҳар иккала бозордан ҳам қониқмаганини, қишлоқ аҳолиси учун янги бозор қурилиши лозимлигини айтганди. Шундан сўнг, вилоят ҳокимлиги ва туман ҳокимлиги томонидан қурилиш материаллари берилиб, ҳашар йўли билан бозор қайта қурилди. Аммо бир йилдан бери сотувга қўйилмаяпти. Бозорга бизга рақобатчи бўлган тадбиркор эгалик қилмоқда», — дейди деҳқонободлик тадбиркор Бекзод Бердиев.

Бекзод Бердиевнинг айтишича, вилоят ҳокими Зоир Мирзаев бозор қайта қурилгач, сотувга қўйилишини, ким сотиб олса бозорга ўша тадбиркор раҳбарлик қилишини айтган.

«Бу ҳақда Деҳқонобод туман ҳокимлигининг расмий сайтида ҳам маълумот берилган. Қолаверса, ‘Дарё’ сайтида ҳам ёритилган. Аммо айтилган ваъда ваъдалигича қолиб кетмоқда», — дейди тадбиркор.

Тадбиркорнинг маълумот беришича, у вилоят раҳбари Зоир Мирзаевга ваъдасини эслатиб, адолатли қарор чиқаришини сўраш учун ҳоким қабулига борган. Аммо вилоят ҳокими қабулига киролмаган.

«Вилоят ҳокими Зоир Мирзаев қабулига киришни сўраб, Зоир Мирзаевнинг тадбиркорлар мурожаати учун ташкил қилинган Telegram'даги манзилига ҳам хабар юбордим. Шунингдек, Суҳроб исмли масъул билан ҳам гаплашдим. Лекин натижа чиқмади», — дейди адолат излаётганини айтган Бекзод Бердиев.

Тадбиркорнинг қўшимча ахборот беришича, у сўнгра Деҳқонобод тумани ҳокими Зоир Алиқулов қабулида бўлган.

«Мени ва айни кунда бозорга раҳбарлик қилаётган тадбиркорларни қабулига чақирган Деҳқонобод тумани ҳокими Зоир Алиқулов бозор тез кунда сотувга қўйилишини, бозорни муносиб номзод сотиб олиши мумкинлигини айтди. Аммо айнан қачон сотувга қўйилишини аниқ айтмади. Сўрасам, кутиб туринг деган жавобни оляпман. Мен шундоқ ҳам бир йилдан ортиқ кутдим», — дейди «Дарё» таҳририятидан нажот сўраб келган тадбиркор.

Деҳқонобод туман ҳокимлиги ахборот хизмати томонидан эълон қилинган муносабатда тадбиркор Бекзод Бердиев шикоят қилаётган муаммо вилоят ҳокими Зоир Мирзаев ҳамда туман раҳбари Зоир Алиқулов назоратига олингани айтилади. Таъкидланишича, муаммо тез орада ечим топади.

«Тадбиркор вилоят ҳокимига мурожаатида 2019 йил 31 декабрь кунги келишувга кўра бозор учун янги жой қурилганини, қурилиш учун барча қурилиш материаллари ҳокимлик томонидан берилганини, бозор эса ҳашар йўли билан қайта қурилганини айтиб, бозорқўмликка беш нафар номзод қўйилиши ва бозор эгалиги сотувга чиқарилишини сўраган. Мазкур масала вилоят ҳокими топшириғига кўра, туман ҳокими эътиборига олинди. Кеча ҳоким Зоир Алиқулов тадбиркорлар билан мулоқот қилиб, муаммо тез орада адолатли ечим топишини маълум қилди», — дейилади бу ҳақда расмий ахборот берган ҳокимлик.

Эслатиб ўтамиз, «Дарё»да эълон қилинган «‘Одам ёллаб тадбиркорни туролмайдиган қилиб калтаклаш буюрилди’. Деҳқонободда тадбиркорлар ўртасида можаро келиб чиқди», сарлавҳали мақолага муносабат билдирган вилоят раҳбари Зоир Мирзаев Деҳқонобод туманидаги бозорлар фаолияти билан танишиб, «Деҳқонободда бундай бозор борлиги қашқадарёликлар учун уят», деганди. Ҳамда муаммо ечими сифатида бир-бири билан тортишаётган ҳар иккала бозор фаолияти ҳам тугатилиб, қишлоқ аҳолиси учун янги бозор қурилиши ҳамда бозорнинг эгалик ҳуқуқи сотилишини маълум қилганди.