Italiya terma jamoasi darvozaboni Janluiji Donnarumma erkin agent sifatida “PSJ”ga o‘tdi. Yevro—2020 chempioni, musobaqaning eng yaxshi futbolchisi 8 yillik faoliyatidan so‘ng “Milan”ni tark etdi. O‘z davrining eng iste’dodli darvozabonining Fransiyaga o‘tishi haqida hikoya qilinadi.
Buffonning rekordini yangiladi va klubdan akasi bilan shartnoma imzolashni so‘radi
2013-yil aprel oyida “Milan” “Napoli” akademiyasi tarbiyalanuvchisi Donnarumma bilan shartnoma imzoladi. “Rossonerilar” futbolchi uchun raqobatda “Yuventus” va “Inter”ni ortda qoldirdi. Oradan 2 yil o‘tib, Janluiji “Milan” bilan professional shartnoma imzoladi va 16 yoshida asosiy tarkibda debyut qildi. Donnarumma A Seriya tarixidagi eng yosh darvozabonga aylandi. Bungacha rekord Buffonga tegishli edi.
U “Milan”ga tezda moslashib ketdi, 2016-yilda esa faoliyatidagi ilk sovrin bo‘lgan Italiya Kubogini qo‘lga kiritdi. Oradan bir yil o‘tib milanliklar darvozabon bilan bitimni yangilash uchun ishga kirishdi, lekin futbolchi akasi Antonio bilan shartnoma imzolashlarini talab qildi. Jamoa darvozabonning aytganini qilishga majbur bo‘ldi, Janluiji esa 4 yillik shartnomaga imzo chekdi.
2021-yil yozida shartnoma muddati tugadi. Yevro—2020 boshlanishidan oldin 22 yoshli Donnarumma “Milan” Chempionlar Ligasiga chiqqaniga qaramasdan shartnomani uzaytirishni istamadi. Jamoa bosh direktori Ivan Gazidis italiyalik futbolchining ketishiga xotirjam munosabatda bo‘ldi.
“Barcha detallarni ochiqlashni istamayman. Oxirgi so‘zni futbolchining o‘zi aytadi. Donnarumma o‘zini doim professionallarcha tutgan. Uning qarorini hurmat qilaman. Nimani muhim deb bilgan bo‘lsa, shuni qildi”, — dedi Gazidis.
Yevropa chempionatida porladi va “PSJ”ga o‘tib ketdi
Donnarumma Yevro—2020 da ajoyib ishtirok etdi. Musobaqada 4 ta gol o‘tkazib yubordi, 3 ta quruq o‘yin o‘tkazdi va UEFAning ramziy terma jamoasiga kiritildi. Undan tashqari Janluiji o‘zi ishtirok etgan 5 ta penaltini qaytargan: 3 ta klubda, 2 tasi terma jamoada. Yevro—2020 ning eng yaxshi futbolchisi sovrinini qo‘lga kiritdi.
Iyun oyida “PSJ” u bilan aloqaga chiqdi va Yevropa chempionatidan so‘ng erkin agent sifatida Parij jamoasiga qo‘shildi. Donnarumma “Milan” bilan ta’sirli tarzda xayrlashdi. Italiyalik darvozabon “rossoneri” muxlislariga ulkan xat yo‘lladi va jamoaning sodiq muxlisi bo‘lib qolishini ta’kidladi.
Donnarumma “PSJ” bilan 2026-yilning yozigacha mo‘ljallangan shartnoma imzolab, yangi chaqiriqqa tayyor ekanligini bildirdi.
Top-jamoaga o‘tganimdan xursandman. Yangi chaqiriqlarga tayyorman va o‘sishda davom etmoqchiman. “PSJ” bilan birga iloji boricha ko‘proq sovrin qo‘lga kiritib, muxlislarni xursand qilmoqchiman.Hozirda uning transfer narxi 60 million yevro atrofida aylanib turadi, lekin “Milan” Janluijini tekinga qo‘yib yubordi. Oxirgi 6 yilda uning transfer narxi 120 martaga oshdi. Endi Donnarumma parijliklarning asosiy darvozaboni Keylor Navas bilan raqobatda g‘olib chiqishga harakat qiladi.Janluiji Donnarumma, darvozabon
Ijtimoiy tarmoqlardagi munosabatlar
“Milan” muxlislari Donnarummaning “PSJ”ga o‘tishini norozilik bilan qarshi oldi. Ular nafaqat klubni, balki futbolchining o‘zini ham aybladi. Masalan, Donnarummani xuddi 2017-yilning yozidagi “Dollarumma” deb atay boshlashdi.
“PSJ”ning rasmiy Twitter’ida muxlislar Donnarummaning yuzi ifoda etgan yevro va dollar rasmlarini joylashtira boshladi.
Izoh (0)