“Nasaf” 10 yil avval OFK Kubogini qo‘lga kiritgandi. Tarixiy natija qayd etgan jamoa a’zolari hozir qayerda?

O‘zbekiston futbolida doimo diqqat markazida poytaxt jamoalari bo‘lib kelgan. Birinchi futbol jamoasi Qo‘qon shahrida paydo bo‘lgan, “Neftchi” va “Navbahor” alohida porlab chiqqan bo‘lsa ham, Toshkent hududidagi jamoalar yetakchilikni hech kimga bermagan. Lekin 2011-yilda Qarshining “Nasaf” jamoasi O‘zbekiston uchun birinchi xalqaro sovrinni qo‘lga kiritdi.

“Uzbekskaya kuxnya” blogi muallifi Yevdokim Raimov “Nasaf”ning tarixiy natijasiga muallif bo‘lganlar ayni damda nima bilan shug‘ullanayotgani haqida material tayyorladi. “Daryo” ushbu maqolani o‘zbek tilida taqdim etadi.

Guruhda birinchi o‘rinni egallagan (to‘plar nisbati 30:4) “Nasaf” nimchorak finalga chiqdi va bir o‘yindan iborat ushbu bosqichda Iordaniyaning “Al-Faysali” jamoasini 2:1 hisobida taslim etdi. Chorak finalda Tailand jamoasi “Chonburi”ni mag‘lub etib, OFK Kubogi yarim finaliga yo‘l oldi. Yarim finalda “Al-Vihdat” jamoasi ustidan g‘alaba qozondi va o‘z tarixida ilk bor finalga chiqdi. Final o‘yini Qarshida bo‘lib o‘tdi. Raqib esa Quvaytning “Al-Quvayt” jamoasi edi. “Nasaf” 2:1 hisobida g‘alaba qozondi va OFK Kubogi sohibiga aylandi. Bu g‘alaba O‘zbekiston tarixidagi eng ko‘zga ko‘rinarli natijalardan biri bo‘lib qoldi.

Azamat Allaniyozov Qoraqalpoq futboli tarbiyalanuvchisi hisoblanadi. Azamat o‘sha musobaqada bir marta o‘yin qaydnomasiga kiritilgan. Lekin biror marotaba maydonga tushmadi. 2016-yilga qadar “Nasaf” sharafini himoya qilgan, keyin esa yuqori liganing turli jamoalarida o‘ynadi. Hozirda Qoraqalpog‘istonning “Aral Samali” jamoasida to‘p suradi.

“Paxtakor” safida besh marta mamlakat chempioniga aylangan Asror Aliqulov “Nasaf”ga faxriy futbolchi sifatida tashrif buyuradi. U yosh futbolchilar bilan o‘z tajribasini bo‘lishardi. Aliqulov yuqori liganing turli jamoalari sharafini himoya qildi va 2016-yilda butsisini mixga ildi. Asror Aliqulov hozirda Pro-Ligada o‘ynaydigan “Sho‘rtan” jamoasi bosh murabbiyi hisoblanadi.

Sherzod A’zamov yarim finalda “Al-Vihdat”ga qarshi uchrashuvdagina maydonga tushgan, xolos. Keyinchalik u “Nasaf”ning yetakchilaridan biriga aylandi. 2015-yilda O‘zbekiston Kubogini qo‘lga kiritdi va bir necha bor mamlakat chempioniga aylandi. 2017-yil iyul oyida “Paxtakor”ga o‘tdi. 2016-yilda terma jamoaga chaqirildi, lekin asosiy tarkibdan o‘rin ololmadi.

Jamoadagi birinchi mavsumida Erkin Boydullayev OFK Kubogining 9 ta o‘yinida ishtirok etib, g‘alaba uchun o‘z hissasini munosib ravishda qo‘shgan. Erkin 2016-yilga qadar “Nasaf” sharafini himoya qilgan. Keyin esa “Qizilqum”ga o‘tgan. 36 yoshga kirgan Erkin Boydullayev hanuz O‘zbekiston Superligasida o‘ynamoqda.

Chernogoriyalik hujumchi 10 ta gol bilan OFK Kubogi to‘purariga aylandi. Milliy chempionatda esa Ivan Boshkovich 4 marta raqiblar darvozasini ishg‘ol qila olgan. Musobaqaning guruh bosqichidayoq 8 ta gol urishga muvaffaq bo‘lgandi. Hindistonning “Dempo” jamoasiga qarshi o‘yinda poker qayd etgan. Hujumchi “Nasaf”da yana bir mavsum qoldi va keyin Tailandga jo‘nab ketdi. Boshkovich Tailanddan so‘ng O‘zbekistonga qaytdi. Bu safar futbolchi emas, murabbiy sifatida. Hozirda “Bunyodkor” akademiyasida faoliyat olib boradi.

O‘zbekiston chempionatida turkmanistonlik futbolchi haqiqiy yulduzga aylandi. OFK Kubogidagi g‘alabadan so‘ng Artur Gevorkyan 2013-yilda chempionatning bronza medaliga ega chiqdi. O‘sha mavsumda hujumchi 18 ta gol bilan ikkinchi eng yaxshi to‘purarga aylandi. Artur “Lokomotiv”, “Qizilqum” kabi jamoalarda ham o‘ynashga ulgurdi. Shundan so‘ng Indoneziyaga yo‘l oldi. Hozirda esa Turkmanistonda faoliyatini davom ettirmoqda.

Jahongir Jiyamurodov yarim finalda hal qiluvchi penaltidan unumli foydalangani bilan yodda qolgan. O‘sha mavsumda Jahongir juda yaxshi o‘yin ko‘rsatgan va ramziy jamoaga kiritilgan.

“Nasaf” bilan 2012-yilda OFK Chempionlar Ligasida ham ishtirok etdi, shundan so‘ng boshqa jamoalarda o‘z omadini sinab ko‘rdi. Murabbiylik faoliyatini ikkinchi divizionda o‘ynaydigan “Zomin” jamoasida boshladi. Yaqinda Toshkentning “Rubin” jamoasi murabbiyligidan iste’foga chiqdi.

Murod Zuhurov jamoaning ushbu musobaqadagi chempionligida asosiy rollardan birini o‘ynagan. Ichki chempionatda 26 ta o‘yinning 10 tasida ishtirok etgan. 2013-yilda sobiq jamoasi “Bunyodkor”ga qaytgan. Faoliyatini o‘sha yerda yakunlagan Murod hozirda “qaldirg‘ochlar”ning ikkinchi jamoasida darvozabonlar murabbiyi sifatida faoliyat olib bormoqda.

Mirzakamol Kamolov o‘sha vaqtdagi “Nasaf”ning zaxira futbolchisi bo‘lgan. OFK Kubogida u 6 ta o‘yinda ishtirok etgan. Faqat bittasida 90 daqiqa harakat qilgan. “Ajdarlar” bilan musobaqada g‘alaba qozongach yana ikki mavsum Qarshida qoldi va keyinchalik boshqa jamoaga o‘tib ketdi. 2019-yilda esa butsisini mixga ildi.

“Nasaf”ning eng hurmatga sazovor himoyachilaridan biri Maqsud Karimov OFK Kubogidagi barcha uchrashuvlarda maydonga tushgan. Hattoki, guruh bosqichida Yamanning “Al-Tilal” jamoasiga qarshi o‘yinda darvozani qo‘riqlashiga ham to‘g‘ri kelgan.

Karimov “Nasaf”da yana yetti yil faoliyat olib bordi va 2019-yilda “Qizilqum” safiga o‘tdi. 34 yoshida esa faoliyatini yakunladi. Hozirda Maqsud “Xorazm” jamoasida sport direktori lavozimida ishlayapti.

Botir Qorayev jamoa sardori bo‘lgan. Faxriy futbolchi bo‘lishiga qaramasdan, OFK Kubogidagi g‘alabadan keyin yana 3,5 mavsum “Nasaf” sharafini himoya qilgan. “Sho‘rtan”da faoliyatini yakunlagan Qorayev “Mash’al” jamoasida murabbiy yordamchisi sifatida ishlay boshladi. 2021-yilning boshida Botir Qorayev “Nasaf”ga sport direktori sifatida qaytdi.

Shuhrat Mirholdirshoyev Qarshi jamoasiga mamlakat chempionatining ikki karra to‘purari sifatida tashrif buyurgan. OFK Kubogida u zaxira hujumchisi rolini bajargan. Umumiy hisobda 39 daqiqa maydonda harakat qilgan futbolchi 2 marta raqib darvozasini ishg‘ol qilgan. Qarshidan ketgach, Andijonda faoliyat olib borgan. Futbolchilik faoliyatini yakunlagach, Shuhrat “Navbahor” murabbiylar shtabida ish boshlagan. Hozirda Namangan futbol assotsiatsiyasi vitse-prezidenti hisoblanadi.

Serbiyalik Boyan Malishich 2011-yildagi muvaffaqiyatli mavsumda asosiy rollardan birini o‘ynagan. Serbiya chempionatidan “Nasaf”ga tashrif buyurgan futbolchi OFK Kubogidagi g‘alaba va mamlakat chempionatidagi bronza medalni qo‘lga kiritgandan so‘ng Ukrainaning “Goverla” jamoasiga o‘tib ketadi. Ukrainadan keyin Gonkong, Filippin jamoalarida o‘ynagan futbolchi 2021-yil boshida “Perseru” jamoasidan ketdi. Malishich yaqinda o‘z Instagram’ida Qarshi jamoasi bilan qo‘lga kiritilgan OFK Kubogini xotirladi.

Terma jamoaning sobiq futbolchisi Fozil Musayev O‘zbekistondagi mashhur o‘yinchilardan biri. 2011-yilda Musayev umidli futbolchilardan biri edi. Chempionlikdan so‘ng yana bir mavsum Qarshi jamoasi sharafini himoya qilgan Fozil “Bunyodkor” safiga o‘tdi. Shundan so‘ng uning faoliyatida qiziqarli tus oldi. Qatar, Eron, Yaponiyadagi “sayr”dan so‘ng Musayev O‘zbekiston Superligasi debyutanti “Turon” jamoasi sharafini himoya qilmoqda.

Mixail Naumov “Nasaf”ning to‘rtinchi darvozaboni edi. Mavsum yakunlangach, Noaumov o‘yin amaliyotiga ega bo‘lish uchun “Sho‘rtan”ga ketdi. Ammo “Sho‘rtan”da ham, boshqa jamoalarda ham Mixail ko‘p o‘ynamadi. Faoliyatidagi so‘nggi muvaffaqiyat 2017-yilda Samarqandning “Dinamo” jamoasida eng yaxshi futbolchi nomiga sazovor bo‘lganidir. Hozirda u Superliga jamoasida darvozabonlar murabbiyi sifatida faoliyat olib bormoqda.

Nosir Otaqo‘ziyev 2010/11-yilgi mavsumda “Olmaliq” (hozirgi “OKMK”) safida chempionat to‘purariga aylangandi. 2011/12-yilgi mavsumda esa “Nasaf” safiga o‘tgan hujumchi asosan zaxira varianti sifatida ko‘rilgan. Otaqo‘ziyev OFK Kubogida 10 ta o‘yinda ishtirok etib, 5 ta golni o‘z hisobiga yozdirib qo‘ygan. 2018-yilda butsisini mixga ilgan hujumchi hozirda Farg‘ona futbol assotsiatsiyasi vitse-prezidenti sifatida faoliyat olib bormoqda.

Ukraina futboli vakili bo‘lgan Andrey Pereplyotkin OFK Kubogi—2011 da “Nasaf”ning g‘alabasida muhim rol o‘ynagan. O‘zbekistonga kelgunga qadar futbolchi Irlandiya klublari, shuningdek, “Sauthempton” va “Derbi Kaunti” jamoalarida to‘p surgan. Andrey jamoaning musobaqadagi barcha o‘yinlarida ishtirok etgan. 2013-yilda “Nasaf”ni tark etib Armaniston, Kipr jamoalari sharafini himoya qilgan. 2017-yilda Latviyaning “Yelgava” jamoasida faoliyatini yakunlagan.

Zafar Polvonov “Nasaf” safida yarim mavsum o‘ynagan. Musobaqada esa bor-yo‘g‘i 58 daqiqa ishtirok etgan. 2017-yildan buyon “OKMK” sharafini himoya qilib keladi.

Axrol Risqullayev OFK Kubogida 8 marta qaydnomaga kiritilgan. Maydonga tushgan bitta uchrashuvida 19 daqiqa o‘ynash nasib etgan, xolos. Shundan so‘ng, Samarqandning “Dinamo” jamoasiga o‘tdi va u yerdagi 2 yillik faoliyatidan so‘ng futbol bilan xayrlashishiga to‘g‘ri keldi. Og‘ir jarohat tufayli futbolchilik faoliyatini erta tugatgan Axrol hakamlik bilan shug‘ullana boshladi. Hozirda Axrol Risqullayev mamlakatning eng oldi hakamlaridan biri.

Eldorbek Suyunov “Mash’al” akademiyasida futbol sirlarini o‘rgangan. 2008-yildan boshlab “Nasaf”ning yoshlar jamoasi tarkibida maydonga tusha boshlagan. Yoshlar tarkibidagi ajoyib o‘yinlari sabab asosiy jamoa murabbiyi Anatoliy Demyanenko nazariga tushadi. 2011-yilgi musobaqada Eldor 22 daqiqa o‘ynagan. Keyinchalik esa qarshiliklarning asosiy darvozaboniga aylangan. 2013-yilda u quruq seriya bo‘yicha chempionat rekordini o‘rnatdi va terma jamoadan chaqiruv oldi. 2017-yilda “Paxtakor” darvozabonni o‘z safiga qo‘shib oldi. Suyunov hozir ham “Paxtakor” sharafini himoya qiladi.

Kenja To‘rayev OFK Kubogida 3 ta o‘yin o‘tkazgan. 2012-yilda To‘rayev OAV tomonidan yanvar oyining eng yaxshi futbolchisi deya e’tirof etildi. 2016-yilda G‘uzorning “Sho‘rtan” jamoasiga o‘tdi. U yerda yarim mavsum o‘ynagan Kenja 2017-yilda Muborakning “Mash’al” jamoasiga o‘tib ketdi.

Lutfulla To‘rayev “Nasaf”ning almashtirib bo‘lmas futbolchisi edi. Pley-off bahslarida asosiy ishlarni bajargan. OFK Kubogidagi chempionlikdan so‘ng To‘rayev “Bunyodkor” safiga o‘tdi. Oradan ikki yil o‘tgach, “Lokomotiv” sharafini himoya qila boshladi. Keyin Malayziyaning “Felda Yunayted” jamoasidagi bir mavsumlik faoliyatidan so‘ng “OKMK”ga qaytib keldi. 2019-yildan buyon “Bunyodkor”da to‘p suradi.

Artyom Filiposyan jamoaning asosiy himoyachisi emasdi. Lekin maydonga tushganida raqib hujumchilariga imkon qoldirmas edi. OFK Kubogi—2011 da Artyom 6 ta o‘yinda maydonga tushdi. Keyingi mavsumda “Bunyodkor” safiga o‘tdi. Undan so‘ng Xitoyda biroz faoliyat olib borgach, Toshkentning “Lokomotiv” jamoasiga qaytdi. Keyin esa Samarqandning “Dinamo”sida, Buxoroning “Buxoro” jamoalarida o‘ynagan Artyom hozirda Tailandning ikkinchi divizionidagi jamoa “Muangkan Yunayted” sharafini himoya qiladi.

Samandar Shodmonov “Nasaf” safida nufuzli musobaqada 3 ta o‘yinda maydonga tushgan. Mavsum o‘rtasida “Nasaf”ni tark etib, “Mash’al”ga o‘tadi. 2018-yilda esa faoliyatini yakunladi.

Eldor Shomurodovning amakisi Ilhom Shomurodov musobaqaning 9 o‘yinida ishtirok etib, 3 ta gol urgan. 2016-yilda og‘ir jarohat tufayli faoliyatini yakunlashga majbur bo‘ladi.

Ilhom Yunusov o‘sha vaqtda jamoaning tajribali futbolchisi bo‘lgan. U OFK Kubogida juda kam o‘ynadi, lekin mamlakat chempionatida jamoasi uchun foydali futbolchi bo‘la oldi. 2015-yilda “Nasaf”ni tark etdi. 2019-yilda “Dinamo” safida faoliyatini yakunladi. Hozirda Odil Ahmedov akademiyasida murabbiy bo‘lib ishlaydi.

Anatoliy Demyanenko 2007-yilda Ukrainada yilning eng yaxshi murabbiyi deb e’lon qilingan. Demyanenko OFK Kubogi—2011 dagi sensatsion g‘alabasiga qaramasdan jamoani tark etdi. Bir nechta intervyusida bu ishidan afsuslanganini ham ta’kidlab o‘tdi. Anatoliy 2020-yil boshida Slovakiyaning “Nitra” jamoasi bosh murabbiyiga aylandi. Ammo aprel oyida iste’foga chiqarildi.