Prezident Shavkat Mirziyoyev tomonidan 24-iyul kuni imzolangan “Davlat xizmatlari ko‘rsatish infratuzilmasini takomillashtirish va aholining davlat xizmatlaridan foydalanish imkoniyatlarini kengaytirish chora-tadbirlari to‘g‘risida”gi farmonga muvofiq, O‘zbekistonda 2021-yil 1-dekabrdan barcha kommunal xizmatlar uchun to‘lovlarni yagona raqam orqali to‘lash imkoniyati joriy etiladi.
Hujjatda ko‘rsatilishicha, 2021-yil 1-dekabrga qadar kommunal tarmoqlardagi barcha raqamlar (gaz, elektr, issiq suv, ichimlik suvi, kanalizatsiya, chiqindi) jismoniy shaxsning shaxsiy identifikatsiya raqamiga va yuridik shaxslarning soliq to‘lovchining identifikatsiya raqamiga bog‘lanishi ta’minlanadi hamda bu orqali har bir shaxsga “yagona mijoz” tamoyili asosida unikal raqamdan foydalangan holda xizmatlar ko‘rsatilishi yo‘lga qo‘yiladi.
Ushbu vazifa ijrosi Davlat personallashtirish markazi, Uy-joy kommunal xizmat ko‘rsatish, Energetika, Axborot texnologiyalari va kommunikatsiyalarini rivojlantirish vazirliklari, Kadastr agentligi, “O‘zsuvta’minot” kompaniyasi hamda manfaatdor vazirlik va idoralar zimmasiga yuklatilgan.
Bundan tashqari, Kadastr agentligi kommunal xizmat ko‘rsatuvchi tashkilotlar bilan birgalikda uch oy muddatda barcha ko‘chmas mulk obyektlarining kadastr raqamlariga bog‘lanishini hamda ko‘chmas mulk obyektlarining yagona manzillar reyestri bilan integratsiya qilinishini ta’minlaydi.
Mavzuga doir:
- O‘zbekistonda 2022-yildan aholi va tadbirkorlardan 15 turdagi hujjat va ma’lumotlarni so‘rash tartibi bekor qilinadi
- O‘zbekistonda “zagranpasport” 20 foizga arzonlashadi
- Shavkat Mirziyoyev chet eldagi vatandoshlar O‘zbekistonning davlat xizmatlaridan onlayn foydalana olishlarini ta’minlash haqida topshiriq berdi
Izoh (0)