Тошкентда 16 июль куни бўлиб ўтаётган «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги халқаро конференция доирасида Шавкат Мирзиёев Европа комиссияси вице-президенти, Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррелни қабул қилди.
Пезидент матбуот хизматининг хабар беришича, учрашувда кўп қиррали Ўзбекистон—ЕИ ҳамкорлигининг долзарб масалалари муҳокама қилинди.
Жозеп Боррел давлат раҳбарига Европа кенгаши раиси Шарль Мишель ва Европа комиссияси раҳбари Урсула фон дер Ляйеннинг саломи, энг эзгу тилакларини етказди. Шунингдек, Ўзбекистон етакчисининг Марказий ва Жанубий Осиё боғлиқлигини мустаҳкамлаш борасидаги глобал ташаббуси муҳим аҳамиятга эга ва ўз вақтида илгари сурилаётганини таъкидлади.
Учрашувда сўнгги йилларда Ўзбекистон ва ЕИ шериклиги жадал суръатлар билан ривожланиб бораётганини мамнуният билан қайд этилди. Кўп қиррали ҳамкорликни, энг аввало, инсон капитали ва демократик янгиланишлар, бизнес, инвестиция ва инновацияларни илгари суриш, «яшил» тараққиёт, экология, маданий алмашинув ва бошқа йўналишларда янада кенгайтириш муҳим экани таъкидланди. Ўзбекистон ва Евроиттифоқ ўртасида кенгайтирилган шериклик ва ҳамкорлик тўғрисидаги янги битим бўйича музокаралар якунига етаётгани маълум қилинди.
Халқаро кун тартиби юзасидан ҳам батафсил фикр алмашилди. Афғонистонда тинчлик ўрнатишга кўмаклашиш масалаларига алоҳида эътибор қаратилди.
Бундан аввал Шавкат Мирзиёев Тошкентда бўлиб ўтаётган конференция доирасида Хитой ташқи ишлар вазирини қабул қилгани, Афғонистон ҳамда Покистон президенти билан учрашгани ҳақида хабар берилганди.
Эслатиб ўтамиз, Тошкент шаҳрида 16 июль куни «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусида халқаро конференция ўз ишини бошлади. Шавкат Мирзиёев ташаббуси билан ташкил этилган анжуманда Афғонистон президенти, Покистон бош вазири, Марказий ва Жанубий Осиё давлатларининг ташқи ишлар вазирлари, жами 44 та мамлакат ва 30 га яқин халқаро ташкилот делегациялари, нуфузли хорижий илмий-тадқиқот ва таҳлил марказлари раҳбарлари иштирок этмоқда.
Изоҳ (0)