Janjallashib qolganidan keyin do‘stona munosabatlariga nuqta qo‘ygan yulduzlar (foto)

Bir vaqtlar munosabatlari yaxshi bo‘lgan, ammo turli sabablarga ko‘ra boshqa-boshqa yo‘ldan ketishni afzal bilgan mashhurlar haqida ma’lumot berib o‘tamiz.

Peris Xilton va Kim Kardashyan

2000-yillarda Peris va Kim deyarli barcha ziyofatlarga birga tashrif buyurgan. Ularga qaratilgan obyektivlar qarshisida bir-birini quchoqlab suratga tushgan. Ammo keyinroq qalin dugonalarning orasidan qora mushuk o‘tgan. Kimning jurnal muqovalarini bezagani, butun dunyoda mashhurlikka erishganini Peris chiday olmagan. Kimga raqobatchi sifatida qaragan xonanda u bilan do‘stligiga nuqta qo‘yishga qaror qilgan. Oradan yillar o‘tgach eski munosabatlarini tiklashga uringan. Bugungi kunga kelib Kardashyan va Xilton bir-biri bilan iliq munosabatda.Peris dam olish kunlari Kimning farzandlari bilan birga vaqtini chog‘ o‘tkazadi.

Gvinet Peltrou va Vaynona Rayder

90-yillarning oxirida hech bir ziyofat va tadbirlar Gvinet va Vaynonasiz o‘tmagan. Orasidan qil o‘ymaydigan dugonalarning munosabatlarida darz ketishiga “Oshiq Shekspir” filmidagi rolni bo‘lisha olmagani sabab bo‘lgan. Gap shundaki, avvaliga Rayder uchun yozilgan rol keyinchalik Gvinetga nasib qolgan. Oqibatda Vaynona nafaqat yaxshi filmda suratga tushish imkoniyati, balki “Oskar” mukofotini qo‘lga kiritishdan ham bebahra qolgan.

Peris Xilton va Nikol Richi

Perisning boshqa yulduz qizlar bilan chiqisha olmasligi yangilik emas. Xonanda bolaligidanoq tanish bo‘lgan Nikol Richi bilan ham shunday bo‘lgan. 2005-yilda bir-biri uchun sobiq bo‘lib ulgurgan yulduzlar har bergan intervyusida bir-biriga loy chaplagan. Ularning bir-biri bilan yuz ko‘rmas bo‘lib qolishiga bu safar ham raqobat sabab bo‘lgan. Kim bilan bo‘lgan vaziyatdan farqli ravishda bu safar Perisga nisbatan nohaqlik bo‘lgan. Mashhur bo‘lishiga yordam berganiga javoban, Richi Perisga nonko‘rlik qilgan.

Selena Gomes va Demi Lovato

Selena Gomes va Demi Lovato mashhurlikka erishishdan avvalroq juda ham qalin dugona bo‘lgan. Bir-birini qo‘llab-quvvatlagan va qanchalik band bo‘lmasin uchrashish uchun vaqt topgan. Ammo hayotning o‘zi hatto eng mustahkam munosabatlar ham vaqti kelsa barbod bo‘lishi mumkinligini ko‘rsatadi. Ularning yuz ko‘rmas bo‘lib ketishiga ismi noma’lum bo‘lgan erkakka bo‘lgan sevgi sabab bo‘lgan.

Madonna va Gvinet Peltrou

Deyarli 10 yil davomida bir-biri bilan ajralmas bo‘lgan mashhurlar o‘rtasidagi munosabatlar 2010-yilga kelib yomonlashgan. Madonnaning ma’lum qilishicha, matbuotga bergan intervyulardan keyin Gvinet bilan muloqot qilish tamoman imkonsiz bo‘lib qolgan. Ular aynan nimani bo‘lisha olmagani esa hali hamon sirligicha qolmoqda.

Ken Peyvs va Jessika Simpson

Stilist Ken Peyvsning Gollivudda mashhurlikka erishishiga uning mijozi Jessika Simpson sababchi bo‘lgan. Ammo vaqt o‘tib ko‘p yillik do‘stlarning munosabatiga kechki ziyofatlarning birida nuqta qo‘yiladi. Buning sababi haqida gap ketganda Simpson izoh bermaslikni afzal bilsa, Peyvs xonanda o‘zidan boshqa hech kimni yaxshi ko‘rmasligini ta’kidlaydi.