Дунё ва ўзбек спортига оид 15 июль кунининг муҳим хабарлари дайжести билан танишинг.
Ўзбекистон
Ўзбекистонлик икки ҳужумчи Беларусь клубига ўтди. «Энергетик-БГУ» ўзбекистонлик футболчилар Бобур Абдухолиқов ва Шаҳбоз Убайдуллаев трансферини эълон қилди. Абдухолиқов Украинанинг «Рух» клубини тарк этган бўлса, Убайдуллаев Беларуснинг «Шахтёр Солигорск»идан келди.Эслатиб ўтамиз, «Энергетик-БГУ» сафида 2020 йилги мавсумда уч нафар ўзбекистонлик футболчи (Жасур Яхшибоев, Шаҳбоз Умаров ва Ҳумоюнмирзо Иминов) тўп сурганди.
Ўзбекистонлик футболчи қизлар CAFA U-23 Women’s Championship мусобақасида иштирок этади. Тожикистонда 18—27 август кунлари 23 ёшгача бўлган Марказий Осиё мамлакатлари футболчи қизлари ўртасида халқаро мусобақа бўлиб ўтади. Унда Ўзбекистон U-23 терма жамоаси Эрон, Қирғизистон, Афғонистон ва Тожикистон вакилларига қарши баҳс олиб боради. Мусобақа гуруҳ босқичидан иборат бўлиб, якунда энг кўп очко тўплаган жамоа ғолиб бўлади.
Жаҳон
Шимолий Америка минтақасида КОНКАКАФ Олтин Кубоги давом этмоқда. Мусобақада Қатар терма жамоаси ҳам иштирок этмоқда. Амалдаги Осиё чемпиони дастлабки турда Панамага қарши баҳс олиб борди ва 3:3 ҳисобидаги жанговар дуранг қайд этди. Шу тариқа Қатар терма жамоаси учта минтақа чемпионатида (Осиё Кубоги, Копа Америка, Олтин Кубоги) иштирок этган тарихдаги илк терма жамоага айланди. Қатарликлар ҳужумчиси Алмоиз Али эса учта турли минтақа бош мусобақасида гол урган биринчи футболчи бўлди.Бундеслига ўйинларига томошабинлар қайтарилади. Бундеслигада мухлислар нафақат уй ўйинларида, балки, сафар баҳсларига бориши мумкин бўлади. Ҳар бир стадиондаги рухсат этилган мухлислар сони ўша ҳудуддаги вазият ва стадионда йўлга қўйилган шароитларга боғлиқ бўлади. Бундан ташқари Бундеслига 2021/22 йилги мавсумида бир ўйинда жамоаларга бештадан захира алмаштириш имконияти тақдим этилади.
Арьен Роббен яна фаолиятини якунлаганини эълон қилди. «Бавария», «Реал», «Челси», «ПСВ» ва «Гронинген» клубларида фаолият юритган ҳужумкор ярим ҳимоячи Арьен Роббен футболчилик фаолиятини якунлаганини маълум қилди. 37 ёшли футболчи бу қарорга келишига мунтазам жароҳатлар сабаб бўлганини таъкидлаб ўтди. Роббен бундан аввал 2019 йилда ҳам фаолиятини якунлашини айтган, бироқ 2020 йилнинг ёзида уни қайта тиклаганди. Роббен фаолияти давомида 31 та совринга эга чиқди.
Германиялик машҳур ҳакам Феликс Брих халқаро майдондаги фаолиятини якунлади. 45 ёшли мутахассис Евро—2020 даги муваффақиятли иштирокдан кейин ушбу қарори ҳақида эълон қилди. Катта футболдаги фаолиятини 2004 йилда бошлаган Брих орадан икки йил ўтиб ФИФА ҳакамига айланганди. Немис фаолияти давомида 2014 ва 2018 йилги мундиалда, шунингдек, «Реал» ва «Ювентус» ўртасидаги (4:1) ЕЧЛ 2016/17 йилги мавсуми финалида ишлаган. У Евро—2020 да бешта ўйинни, хусусан, ярим финал доирасидаги Италия—Испания учрашувини (1:1, пенальтилар серияси — 4:2) бошқариб борди.
Трансфер янгиликлари
«Челси» Эрлинг Ҳоландни қўлга киритишга жиддий киришмоқда. Sky Спорцънинг хабар қилишича, лондонликлар Ҳоланд учун Дортмунд клубига Тэмми Абраҳам ёки Каллум Ҳадсон-Одоини беришга тайёр эканини маълум қилган. Бироқ «Боруссия» футболчи бу ёзда сотилмаслигини айтган. Италиялик инсайдер Фабрисио Романога кўра, немис клуби 20 ёшли футболчи борасида бирорта ҳам таклиф олмаган.
«Манчестер Сити» Роберт Левандовскига қизиқиш билдирмоқда. «Шаҳарликлар» 32 ёшли польшалик футболчига Ҳарри Кейннинг альтернатив варианти сифатида қарамоқда, дея хабар қилмоқда Daily Mail. Бироқ Робертнинг мюнхенликлар билан амалдаги шартномаси 2023 йил ёзига қадар амал қилади. Аввалроқ «Тоттенҳэм» Кейн трансфери борасида Манчестер клубининг 100 миллион фунтлик таклифини рад этгани хабар қилинганди.
Изоҳ (0)