Ijtimoiy tarmoqlarda Toshkent shahridagi Amir Temur haykali oldida yuzlab fuqarolar O‘zbekistonga kelgan rossiyalik blogerni ko‘rish uchun to‘plangani tasvirlangan videolar tarqaldi. Poytaxt IIBB mazkur holat yuzasidan rasmiy ma’lumot berdi.
Ma’lum qilinishicha, 13-iyul kuni taxminan soat 22:30 larda Toshkent shahriga Instagram va YouTube ijtimoiy tarmoqlarida Subo nomi bilan tanilgan bloger – 22 yoshli Rossiya fuqarosi Subxan Mamedov tashrif buyurgan. Bundan oldinroq u o‘zining sahifasida tez orada Toshkentda bo‘lishini va obunachilari bilan uchrashib, ularga pul tarqatishini ma’lum qilgan.
Shu sababli poytaxtning Amir Temur xiyobonida Suboni kutib olish uchun 150-200 ga yaqin fuqaro yig‘ilgan.
Hozirgi kundagi epidemiologik vaziyatni inobatga olinib, mamlakatda karantin cheklovlari o‘rnatilgani sababli, Ichki ishlar organlari va Milliy gvardiya xodimlari tomonidan fuqarolarga karantin qoidalariga rioya etishlari hamda ommaviy ravishda to‘planmasliklari tushuntirilgan va fuqarolar tarqatilgan.
Bloger Subxan Mamedov bilan esa profilaktik suhbat o‘tkazilgan. Mazkur voqeada qonun buzilishi holatlari va tartibsizliklar yuz bermagan.
Subxan Mamedovning so‘zlariga ko‘ra, u Nukusda saratonga chalingan obunachisini o‘z jamoasi bilan Dubayga olib ketish uchun kelgan. Kechasi Toshkentdan uchishlari kerakligi sabab yo‘lda Instagram’dagi sahifasiga obunachilarini Amir Temur haykali oldida kutishini yozib qoldirgan.
“Maydon atrofidan o‘tayotganimda juda ko‘p olomon yig‘ilganini ko‘rdim. Mashinadan tushishim bilan odamlar meni o‘rab oldi. Bu yerdan ketish kerakligini tushundim va politsiyachilar [IIB xodimlari] mashinamga o‘tirishimga yordam berdi. Agar ular o‘z vaqtida chora ko‘rmaganida, barchasi yomon tugashi mumkin edi…”, — deydi bloger.
“Toshkent shahar IIBB fuqarolarimizdan bunday mazmundagi chaqiriqlarga uchmasliklarini va karantin qoidalariga rioya etgan holda ommaviy ravishda to‘planmasliklarini so‘rab qoladi”, — deyiladi munosabatda.
Izoh (0)