Toshkent viloyatidagi Keles yo‘li ko‘chasining bir qismi transport harakati uchun noma’lum muddatga yopiladi

Keles yo‘lining Toshkent viloyatidan o‘tgan bir qismi ta’mirlash ishlari sabab yopiladi, deya xabar bermoqda viloyat hokimligi matbuot xizmati.

Ma’lum qilinishicha, olib borilayotgan qurilish-ta’mirlash ishlari munosabati bilan Keles yo‘li ko‘chasining Toshkent tumaniga kirish qismidan “Hasanboy ota” jome masjidigacha bo‘lgan qismi 2021-yil 14-iyul kuni soat 09:00 dan ta’mirlash ishlari yakunlangunga qadar transport vositalari harakati uchun vaqtinchalik to‘liq yopiladi.

Ushbu yo‘nalishda harakatlanadigan transport vositalari harakati vaqtinchalik tumanning Hasanboy qishlog‘i hududidan o‘tgan 4N-699 hamda sobiq M.Fozilov jamoa xo‘jaligi hududidan o‘tgan 4R-4 avtomobil yo‘llari orqali tashkil etiladi.

Xabarda ta’mirlash ishlari qachongacha davom etishi haqida ma’lumot berilmagan.

Bundan avval Toshkentda o‘tkaziladigan xalqaro konferensiya sabab ayrim avtobuslar yo‘nalishi o‘zgargani haqida xabar berilgandi.