Jorjio Armanining yulduzlar uchun taqdim qilgan eng chiroyli liboslari (foto)

Dizayner Jorjio Armani 2021-yil 11-iyul kuni 87 yoshga to‘ldi. Aslida shifokor bo‘lishni orzu qilgan Jorjio 60-yillarda Nino Cherutti rahbarligi ostida dizaynerlik bilan shug‘ullana boshlagan. 1974-yilda o‘z brendiga asos solgan va shundan buyon moda olamida uzoq yo‘lni bosib o‘tgan Armani bugungi kunda eng muvaffaqiyatli italiyalik dizaynerlardan biri sanaladi. Yaxshi bichim va sifatli mato tamoyili asosida faoliyat olib boradigan dizaynerga har yili mashhurlar tantanali marosimlarda ko‘rinish berish uchun murojaat qiladi. Jorjio Armanining eng yaxshi liboslari suratini e’tiboringizga havola etamiz.

Anjelina Joli

90-yillarda sochini o‘g‘il bolalar singari kalta qilib kestirgan Anjelina Joli qizil yo‘lakdagi obrazida balans bo‘lishi uchun bashang ko‘rsatadigan libos tanlashni afzal bilgan. Armani brendidan midi uzunligidagi, tasmali libos kiygan aktrisa uni kumush rang bosonojka bilan moslagan.

Enn Xeteuey

Enning qomatiga urg‘u bergan kumush rang libos esa dizaynerning qanchalik o‘z ishining ustasi ekanining yana bir isboti.

Beyonse

Har qanday libos yarashadigan Beyonseni mazkur oq, uzun ko‘ylak yanada latofatli qilgan. Libosning bichimi, toshlar bilan bezalgani uning o‘ziga xos ko‘rinishiga sababchi bo‘lgan.

Tina Kunaki

Dizayner nafaqat uzun, balki kalta ko‘ylaklarni tikishni ham qoyillatadi. Tina tanlagan oq patli va bel qismida qora belbog‘i bor libos buning isboti.

Jennifer Lopes

Armani libosining muxlislari orasida Jennifer Lopes ham bor. Alohida tadbir uchun ushbu brenddan uzun oq libos tanlagan xonandaning obrazi sochlarini yig‘gani va baland poshnali poyabzal kiygani hisobiga yanada o‘ziga xos ko‘ringan.

Keyt Blanshett

Dizayner Keyt uchun uzun va gullar bilan bezalgan libos tikkan. Aktrisa aynan mazkur ko‘ylakda “Oskar” mukofotiga sazovor bo‘lgan.

Jessika Chesteyn

Jessika tanlagan libos esa bir vaqtning o‘zida shohona va oddiyligi bilan kishi e’tiborini tortadi.

Julianna Mur

Juliannaning Armani brendidan tanlagan qora, yeng qismi patlar bilan bezalgan libosi esa XX asr yulduzlarining obrazini esga soladi.

Sara Polson

Dizayner noodatiy detallardan foydalangan taqdirda ham libos hashamatli ko‘rinishi mumkin. Buni Sara qizil yo‘lakda kiygan to‘rdan tikilgan ko‘ylakdan bilish mumkin.

Zoi Kravis

Zoi Kravis uchun qizil matodan uzun, qomatga urg‘u berib tikilgan libos esa yig‘ilgan soch turmagi va o‘ziga xos bilaguzugi bilan uyg‘un ko‘ringan.