2021-yilning iyun o‘rtalarida ijtimoiy tarmoqlarda Namanganda voyaga yetmagan bolalar tovuqlarga zarar yetkazgan itni daraxtga osib qo‘ygani tasvirlangan video tarqalgan edi. Holat yuzasidan Chortoq tuman IIB xodimlari tomonidan tergovga qadar surishtiruv harakatlari olib borildi va bolalarning ota-onalari hamda uni videoga olib tarqatgan fuqarolar jarimaga tortildi.

Foto: Telegram / “Mehr va oqibat”

Namangan IIB xabariga ko‘ra, 24-may kuni Chortoq tumani “Sohibkor” mahallasida yashovchi ikki nafar maktab o‘quvchisi uyidagi tovuqlariga zarar yetkazgan itni dalaga tashlab kelish maqsadida uni o‘zi bilan olib, uydan chiqadi. “O‘zlari sodir etayotgan harakatlarning huquqiy oqibatini tushunib yetmasdan, itni chinor daraxtiga osgan”, — deyiladi xabarda.

Ushbu holatni Chortoq tumani “Hayrli” mahallasida yashovchi I.B. (2003-yilda tug‘ilgan) videotasvirga olgan. U Telegram ijtimoiy tarmog‘idagi sinfdoshlar guruhiga yuborgan. 27-may kuni videoni 11-sinf o‘quvchisi A.T. TikTok ijtimoiy tarmog‘iga joylashtirgan. Videotasvirdagi kuchukni, uni osgan bolalardan biri parvarishlayotgani aytilgan edi.

29-iyun kuni Jinoyat ishlari bo‘yicha Chortoq tuman sudi tomonidan 2003-yilda tug‘ilgan S.O. hamda 2003-yilda tug‘ilgan N.A.ga nisbatan Ma’muriy javobgarlik to‘g‘risidagi kodeksning 189-moddasi 1-qismiga (voyaga yetmagan shaxsni ma’muriy huquqbuzarlik sodir etishga jalb qilish) asosan ish hujjatlari ko‘rilib, ularga nisbatan 2 million 450 ming so‘mdan jarima jazosi tayinlandi.

Voyaga yetmaganlar, 2008-yilda tug‘ilgan M.N.ning otasi O.N va 2009-yilda tug‘ilgan O.R.ning otasi N.R.ga nisbatan Ma’muriy javobgarlik to‘g‘risidagi kodeksning 47-moddasi 1-qismiga (ota-onalar yoki ularning o‘rnini bosuvchi shaxslar tomonidan voyaga yetmagan bolalarni tarbiyalash va ularga ta’lim berish borasidagi majburiyatlarni bajarmaslik, shu jumladan, voyaga yetmagan bolalarning ma’muriy huquqbuzarlik sodir etishiga olib kelishi) asosan to‘plangan hujjatlar Voyaga yetmaganlar ishlari bo‘yicha tuman idoralararo komissiyasi tomonidan ularga nisbatan bazaviy hisoblash miqdorining bir baravari miqdorida, ya’ni 245 ming so‘m miqdorida jarima jazosi belgilangan.