“O‘zbekiston uchun yaxshi imkoniyat” — Forbes Xitoy paxtasiga qarshi sanksiyalar haqida

AQSh Xitoydan paxta import qilishni cheklashga tayyorgarlik ko‘rmoqda. Ushbu hafta AQSh bojxona va chegarani qo‘riqlash agentligi Sinszyan provinsiyasidagi yana beshta Xitoy kompaniyasining importiga taqiq qo‘ydi — “qora ro‘yxat” to‘qqiztaga yetdi, deb yozadi Spot.

Sanksiyalarga majburiy mehnatdan foydalanilishi sabab bo‘lmoqda. Taqiqlarning aksariyati paxtaga taalluqli, Sinszyan esa Xitoydagi jami paxtaning 2/3 qismini yetkazib beradi.

Amerikaning Forbes jurnali yozishicha, bu kabi o‘zgarishlarda O‘zbekiston yaqqol ko‘zga tashlanmoqda. Yaqin vaqtlargacha paxta dalalarida majburiy mehnatga oddiy holat sifatida qarab kelinardi, biroq so‘nggi yilda hukumat muammo bilan jiddiy shug‘ullanib, uni imkon boricha bartaraf etishga urinmoqda.

Nashrning ta’kidlashicha, mamlakat bu ishni hatto AQSh tomonidan bosim o‘tkazilmayotgan bo‘lsa-da, amalga oshirmoqda, chunki Amerika notinch Afg‘oniston mintaqasi sabab strategik ahamiyatga ega davlat bilan munosabatlarni buzishni istamaydi.

Forbes asosiy yutuqlarni sanab o‘tgan — dalalarda majburiy bolalar mehnati yo‘q, terimchilarga to‘lanadigan haq oshgan, paxtaga davlat buyurtmasi bekor qilingan. Shu sababli The Economist O‘zbekistonni yil mamlakati deb atagan.

“O‘zbekiston majburiy mehnatni qisqartirish yo‘lida tez odimlamoqda. U hozirga qadar Xitoy paxtasi egallagan joyni band etishi mumkin. Bu O‘zbekistonni Markaziy Osiyoning global miqyosdagi integratsiyalashgan iqtisodiyotiga aylanishida ijobiy ta’sir ko‘rsatgan bo‘lar edi”, — deyiladi maqolada.

Ma’lumot uchun, uzoq yillar davomida paxta terimi mavsumida bolalar va majburiy mehnatdan foydalanilgani bois O‘zbekiston paxtasi xalqaro jamoatchilik tomonidan “qora ro‘yxat”ga kiritilgan, yetakchi ishlab chiqaruvchilar O‘zbekiston paxtasini boykot qilgan edi. Xalqaro mehnat tashkilotining Vashingtondagi ofisi direktori Kevin Kassidi esa o‘zbek paxtasi boykotini asossiz deb e’lon qilgandi.

2019-yilning 4-fevralida o‘sha vaqtdagi bosh vazir o‘rinbosari Tanzila Norboyeva boshchiligidagi delegatsiyaning Vashingtonga ishchi tashrifida Cotton Campaign to‘qimachilik mahsulotlariga qarshi boykotni bekor qilish bo‘yicha rejasini taqdim etgan edi.