Farg‘ona viloyatining Yozyovon tumanida 29 yoshli erkak qo‘shni kelinni pichoqlab qo‘ydi. Ayol shifoxonada vafot etdi. Bu haqda “Daryo” muxbiri so‘roviga ko‘ra viloyat prokuraturasi ma’lum qildi.

Ma’lum bo‘lishicha, 2021-yilning 22-iyun kuni Yozyovon tumanida yashovchi 1992-yilda tug‘ilgan N.U. qarzlaridan qutilish maqsadida qo‘shnisi I.S.dan 2 ming dollar pul olgan. Shundan so‘ng N.U. qo‘shnisining uyida ko‘p miqdorda pul bo‘lishi mumkinligini taxmin qilgan. U 23-iyun kuni, taxminan, soat 10:00 da qo‘shnisinikida hech kim yo‘qligidan foydalanib, uning xonadoniga g‘ayriqonuniy tarzda kirgan. Xonadondagi mol-mulklarni yashirincha qo‘lga kiritmoqchi bo‘lgan vaqtida qo‘shni kelin M.Q. kelib qolgan.

N.U. qilmishi oshkor bo‘lishidan qo‘rqib, qo‘shni kelinga pichoq bilan hujum qilib, tanasining turli sohalariga tan jarohatlari yetkazgan. M.Q. faol qarshilik ko‘rsatib, qo‘shnilarni yordamga chaqirgani uchun N.U. hodisa joyidan yashiringan.

Fuqaro M.Q. ko‘rsatilgan tibbiy yordamga qaramasdan, olgan tan jarohatlari natijasida shifoxonaning jonlantirish bo‘limida vafot etgan.

2021-yil 23-iyun kuni mazkur holat yuzasidan Yozyovon tuman prokuraturasi tomonidan U.N.ga nisbatan Jinoyat kodeksining 97-moddasi 1-qismi “i” bandi (ta’magirlik niyatida qasddan odam o‘ldirish), 164-moddasi 3-qismi “v”, “g” (uy-joyga, omborxona yoki boshqa binolarga g‘ayriqonuniy ravishda kirgan holda badanga og‘ir shikast yetkazib, bosqinchilik qilish) bilan jinoyat ishi qo‘zg‘atilgan.

Mazkur holat yuzasidan gumonlanuvchi Yozyovon tumani prokuraturasi tomonidan protsessual tartibda ushlangan. Hozirda dastlabki tergov harakatlari olib borilmoqda. Jinoyat ishining tergovi ustidan viloyat prokuraturasi nazorat o‘rnatgan.