Samarqandda 12 yil davomida odamlarning umumiy 1,5 mlrd so‘m pullarini o‘zlashtirgan ayol ushlandi

Fuqarolarning 1,5 milliard so‘mdan ortiq pullarini o‘zlashtirgan ayol Samarqand viloyatida qo‘lga olindi, deya xabar qilmoqda Toshkent shahar IIBB axborot xizmati.

Qayd etilishicha, 2020-yil mart oyida IIO Faoliyatini muvofiqlashtirish boshqarmasi navbatchilik qismiga fuqaro D.Q. ismli ayol ariza bilan murojaat qilgan.

O‘z arizasida u M.D. ismli ayolga oziq-ovqat mahsulotlarini past narxda yetkazib berish uchun 50 million so‘m berganini va uni hozirda firibgarlikda gumon qilib chora ko‘rishni so‘ragan.

Olib borilgan tergov-qidiruv jarayonlarida o‘zini odamlarga M.D. deb tanishtirgan shaxs bir necha fuqaroga juda ko‘p miqdorda firibgarlik holatlarini sodir etgani aniqlandi. Tergov harakatlari davomida uning haqiqiy ismi T.D. ekani aniqlanib, mazkur shaxsga nisbatan qidiruv e’lon qilingan.

Jinoyat qidiruv xodimlari olib borgan tezkor tadbirlari natijasida T.D. 2021-yil Samarqand viloyatida ushlanib, ehtiyot chorasi tariqasida qamoqqa olingan.

“Oilaviy sharoitim to‘g‘ri kelmasdan 1994-yil turmush qurgan uyimdan chiqib ketdim. 2009-yildan beri qidiruvdaman. Qozog‘istondan yog‘, shakar kabi mahsulotlarni olib kelib yurardim. Odamlar bergan pullarni o‘zimni ehtiyojim uchun ishlatib yuborardim.

Shu vaqt ichida hujjatim yo‘qligi sabab xorijga chiqmaganman. Qilgan ishlarimdan mingdan ming pushaymonman”, – deydi gumonlanuvchi.

Mazkur holat yuzasidan T.D.ga Jinoyat kodeksining 168-moddasi 2-qismi “a” bandi (ancha miqdorda firibgarlik), 168-moddasi 3-qismi “a”, “b” bandi (ko‘p miqdorda va takroran sodir etilgan firibgarlik), 168-moddasi 4-qismi “a” bandi (juda ko‘p miqdorda firibgarlik) va boshqa bir qancha moddalar bilan ayblov e’lon qilinib, ehtiyot chorasi tariqasida qamoqqa olish qo‘llanilgan.

Tergov harakatlari yakuniga ko‘ra, T.D. jami 24 nafar fuqaroga nisbatan firibgarlik jinoyati sodir etib, umumiy miqdorda 1 milliard 500 million so‘mdan ortiq moddiy ziyon yetkazgani aniqlangan.

Hozirgi vaqtda jinoiy ish Jinoyat ishlari bo‘yicha Uchtepa tuman sudiga yuborilgan.

Bundan avval Chirchiq davlat pedagogika institutiga o‘qishga kiritib qo‘yish uchun ikki kishidan 9 ming dollar olgan yana bir shaxs ushlangani, Samarqandda taniqli aktrisa nomidan soxta profil ochib, odamlarning bank kartalaridan pul yechib olgan 18 yoshli yigit ushlangani hamda Samarqandda fuqaroni aldab, uning 50 ming dollar pulini o‘zlashtirgan advokat 7 yilga ozodlikdan mahrum qilingani haqida xabar berilgandi.