Тошкент ҳайвонот боғида апрель охиридан майнинг ўртасигача холдор буғулар, узун ёлли қўйлар, ламалар ва кўплаб улоқчалар дунёга келди, деб хабар беради муассаса матбуот хизмати.
Маълум қилинишича, ҳайвонот боғидаги лан (буғуларга мансуб жуфт туёқли ҳайвон) ва гарна (кичик антилопа) ҳам болалаган.
Бундан ташқари, 22 июнь кунида тибет қўтоси дунёга келган бўлиб, у кўзларини очай деб қолган.
Туёқлилар бўлими бошлиғи Ботир Мақсудхўжаевнинг сўзларига кўра, барча ҳайвонлар оналари бағрида, сут билан озиқланяпти ва ўзларини жуда яхши ҳис қилмоқда.
Аввалроқ Тошкент ҳайвонот боғига жуда кам учрайдиган иккита оқ рангли шер болалари олиб келингани тўғрисида хабар берилганди.
Эслатиб ўтамиз, 2020 йилнинг январида Германиянинг dan pearlman Group компанияси Тошкент ҳайвонот боғини реконструкция қилиш лойиҳасини ишлаб чиқишга ёрдам кўрсатиши маълум бўлганди. Компания Германия, Грузия, Италия, Буюк Британия, Дания, Жанубий Корея ва бошқа мамлакатларда ҳайвонот боғларини ривожлантириш режалари ва дизайнларини ишлаб чиққан. 2021 йилнинг февралида эса боғнинг модернизация лойиҳасига оид бир нечта концептлар тақдим этилган эди.
Изоҳ (0)