Transfer bozorida “katta ov”ni boshlagan “Real”, xalqaro musobaqada Saudiya Arabistoniga yengilgan O‘zbekiston terma jamoasi va Angliyaning kutilmagan yo‘qotishi. Eng so‘nggi sport yangiliklari

Dunyo va o‘zbek sportiga oid 22-iyun kunining muhim xabarlari dayjesti bilan tanishing.

O‘zbekiston

Futzal bo‘yicha O‘zbekiston milliy terma jamoasi 24 va 27-iyun kunlari Toshkentda Venesuela terma jamoasiga qarshi xalqaro o‘rtoqlik o‘yinida ishtirok etadi. O‘FA uchrashuvlar boshlanish vaqtini ma’lum qildi. Birinchi o‘yin Toshkent vaqti bilan 19:00 da boshlansa, ikkinchi bahs 18:00 da start oladi.

“Arab Cup U-20” musobaqasida ishtirok etayotgan O‘zbekiston U-18 terma jamoasi Misrdagi musobaqaning dastlabki turida Saudiya Arabistoniga qarshi bahs olib bordi. Unda Eldor Magdiyev shogirdlari 0:2 hisobidagi mag‘lubiyatni qabul qilib oldi. Keyingi uchrashuvni o‘zbekistonliklar 24-iyun kuni Tunisga qarshi o‘tkazadi.

PFL bosh direktori vazifasini bajaruvchi Diyor Imomxo‘jayev “Offside” ko‘rsatuvida mehmon bo‘ldi. Unda funksioner O‘zbekiston terma jamoasining sobiq bosh murabbiyi Vadim Abramovning faoliyatini keskin tanqid ostiga oldi (batafsil).

Jahon

Yevro—2020 musobaqasida dastlabki uchta tur o‘yinlari yakunlandi. Hozirga qadar 7 ta jamoa pley-off masalasini hal qildi. Eng yaxshi to‘rtinchi o‘rinlar reytingida Finlyandiya va Ukraina so‘nggi o‘rinlarda bormoqda, ular qolgan guruhlardagi vaziyatni kutishga majbur.

Angliya terma jamoasida kutilmagan yo‘qotish

Angliya terma jamoasi yarim himoyachilari Meyson Maunt va Ben Chiluell Yevropa chempionati 3-turi doirasida Chexiyaga qarshi uchrashuvni o‘tkazib yuboradi. Gap shundaki, “Chelsi” futbolchilari koronavirusga chalingan Billi Gilmor bilan muloqotda bo‘lgan. Maunt va Chiluell izolyatsiyaga olingan va so‘nggi tur o‘yinida jamoasiga yordam bera olmaydi.

Usmon Dembele uzoq muddatga safdan chiqdi

“Barselona” klubi va Fransiya terma jamoasi hujumkor yarim himoyachisi Usmon Dembele jarrohlik amaliyotini boshdan kechiradi. L’Equipe nashrining xabar qilishicha, fransiyalik futbolchining tiklanish jarayoniga 4 oy vaqt ketadi. 24 yoshli futbolchi Fransiya terma jamoasi safida jarohat olgan va shu sabab Yevro—2020 ni tark etgandi.

Transferlarga oid xabarlar

“Real” Erling Holand bilan kelishuvga erishdi

Madridliklar norvegiyalik futbolchi bilan kelishib oldi va endilikda “Borussiya D” bilan muzokara olib bormoqda. Deportes Cuatro nashrining xabar qilishicha, nemis klubi “Real”ning 100 million yevrolik dastlabki taklifini rad etgan. Avvalroq “Real” “PSJ” hujumchisi Kilian Mbappeni qo‘lga kirita olmasa bor e’tiborini Holandga qaratishi xabar qilingandi.

“Manchester Siti” Harri Keyn transferini kechiktiradi

“Tottenhem” prezidenti Deniel Levi angliyalik futbolchini sotishni istamayapti va murabbiylikka nomzodlarga hujumchi keyingi mavsum ham jamoada qolishini aytmoqda. Shu sabab “Siti” yana bir yil kutish niyatida, deya xabar qilmoqda ESPN.

Qayd etilishicha, Rahim Sterlingning transferning bir bo‘lagi bo‘lishni istamagani ham muzokaralarni chigallashtirgan. Avvalroq “Manchester Siti” Keyn transferi uchun 100 million funt va futbolchilaridan birini berishga tayyorligi xabar qilingandi.

Serxio Ramosga APL klublari va “PSJ” qiziqmoqda

“Real”ni erkin agent maqomida tark etgan Serxio Ramosga “PSJ”, “Manchester Yunayted” va “Manchester Siti” klublaridan takliflar bor, deya xabar qilmoqda AS. 35 yoshli himoyachining o‘zi Parij variantini ma’qul ko‘rmoqda. Avvalroq “Roma” ustozi Joze Mourinyo uni o‘z jamoasida ko‘rmoqchi ekani xabar qilingandi.