Трансфер бозорида «катта ов»ни бошлаган «Реал», халқаро мусобақада Саудия Арабистонига енгилган Ўзбекистон терма жамоаси ва Англиянинг кутилмаган йўқотиши. Энг сўнгги спорт янгиликлари

Дунё ва ўзбек спортига оид 22 июнь кунининг муҳим хабарлари дайжести билан танишинг.

Ўзбекистон

Футзал бўйича Ўзбекистон миллий терма жамоаси 24 ва 27 июнь кунлари Тошкентда Венесуэла терма жамоасига қарши халқаро ўртоқлик ўйинида иштирок этади. ЎФА учрашувлар бошланиш вақтини маълум қилди. Биринчи ўйин Тошкент вақти билан 19:00 да бошланса, иккинчи баҳс 18:00 да старт олади.

«Аrab Cup U-20» мусобақасида иштирок этаётган Ўзбекистон U-18 терма жамоаси Мисрдаги мусобақанинг дастлабки турида Саудия Арабистонига қарши баҳс олиб борди. Унда Элдор Магдиев шогирдлари 0:2 ҳисобидаги мағлубиятни қабул қилиб олди. Кейинги учрашувни ўзбекистонликлар 24 июнь куни Тунисга қарши ўтказади.

ПФЛ бош директори вазифасини бажарувчи Диёр Имомхўжаев «Offside» кўрсатувида меҳмон бўлди. Унда функционер Ўзбекистон терма жамоасининг собиқ бош мураббийи Вадим Абрамовнинг фаолиятини кескин танқид остига олди (батафсил).

Жаҳон

Евро—2020 мусобақасида дастлабки учта тур ўйинлари якунланди. Ҳозирга қадар 7 та жамоа плей-офф масаласини ҳал қилди. Энг яхши тўртинчи ўринлар рейтингида Финляндия ва Украина сўнгги ўринларда бормоқда, улар қолган гуруҳлардаги вазиятни кутишга мажбур.

Англия терма жамоасида кутилмаган йўқотиш

Англия терма жамоаси ярим ҳимоячилари Мэйсон Маунт ва Бен Чилуэлл Европа чемпионати 3-тури доирасида Чехияга қарши учрашувни ўтказиб юборади. Гап шундаки, «Челси» футболчилари коронавирусга чалинган Билли Гилмор билан мулоқотда бўлган. Маунт ва Чилуэлл изоляцияга олинган ва сўнгги тур ўйинида жамоасига ёрдам бера олмайди.

Усмон Дембеле узоқ муддатга сафдан чиқди

«Барселона» клуби ва Франция терма жамоаси ҳужумкор ярим ҳимоячиси Усмон Дембеле жарроҳлик амалиётини бошдан кечиради. L’Equipe нашрининг хабар қилишича, франциялик футболчининг тикланиш жараёнига 4 ой вақт кетади. 24 ёшли футболчи Франция терма жамоаси сафида жароҳат олган ва шу сабаб Евро—2020 ни тарк этганди.

Трансферларга оид хабарлар

«Реал» Эрлинг Ҳоланд билан келишувга эришди

Мадридликлар норвегиялик футболчи билан келишиб олди ва эндиликда «Боруссия Д» билан музокара олиб бормоқда. Deportes Cuatro нашрининг хабар қилишича, немис клуби «Реал»нинг 100 миллион евролик дастлабки таклифини рад этган. Аввалроқ «Реал» «ПСЖ» ҳужумчиси Килиан Мбаппени қўлга кирита олмаса бор эътиборини Ҳоландга қаратиши хабар қилинганди.

«Манчестер Сити» Ҳарри Кейн трансферини кечиктиради

«Тоттенҳэм» президенти Дэниэл Леви англиялик футболчини сотишни истамаяпти ва мураббийликка номзодларга ҳужумчи кейинги мавсум ҳам жамоада қолишини айтмоқда. Шу сабаб «Сити» яна бир йил кутиш ниятида, дея хабар қилмоқда ESPN.

Қайд этилишича, Раҳим Стерлингнинг трансфернинг бир бўлаги бўлишни истамагани ҳам музокараларни чигаллаштирган. Аввалроқ «Манчестер Сити» Кейн трансфери учун 100 миллион фунт ва футболчиларидан бирини беришга тайёрлиги хабар қилинганди.

Серхио Рамосга АПЛ клублари ва «ПСЖ» қизиқмоқда

«Реал»ни эркин агент мақомида тарк этган Серхио Рамосга «ПСЖ», «Манчестер Юнайтед» ва «Манчестер Сити» клубларидан таклифлар бор, дея хабар қилмоқда АS. 35 ёшли ҳимоячининг ўзи Париж вариантини маъқул кўрмоқда. Аввалроқ «Рома» устози Жозе Моуриньо уни ўз жамоасида кўрмоқчи экани хабар қилинганди.