Ijtimoiy tarmoqda “Kuniga 50 ta bayonnoma yozadigan GAI” sarlavhasi ostida video tarqaldi. Holat yuzasidan YHXBB ma’lumot berdi.
Qayd etilishicha, 2021-yil 16-iyun kuni ijtimoiy tarmoqda “Kuniga 50 ta bayonnoma yozadigan GAI” sarlavhasi ostidagi video lavha tarqaldi.
Video lavha o‘rganilganda, 2021-yil 14-iyun kuni Toshkent viloyati, Angren shahar IIB YHXB YPX xodimi Sh.S. Angren shahar, Ibn Sino ko‘chasida Lada Largus rusumli avtomobil haydovchisini xavfsizlik kamaridan foydalanmagani bois to‘xtatgan va unga nisbatan ma’muriy bayonnoma rasmiylashtirgan.
Video lavhada haydovchining talabiga ko‘ra, YPX xodimi tomonidan ko‘rsatilgan dislokatsiya ko‘chirmasining muddati 2020-yil qilib belgilangani aytilgan.
Shuningdek, haydovchi telefonda muloqot qilgan bo‘lim boshlig‘i S.A. YPX xodimi xavfsizlik kamari bo‘yicha kuniga 50 ta bayonnoma yozishi kerakligini ta’kidlagan.
Mazkur holatlar yuzasidan Toshkent viloyati IIBB YHXB mas’ullari tomonidan xizmat tekshiruvi o‘tkazilmoqda.
Bundan avval Yunusobodda IIBB xodimlari ayollarga kuch ishlatgani aytilgan video tarqalgani, Buxoroda 17 yil avval xizmatga noloyiqligi sabab ishdan bo‘shatilgan IIB xodimi soxta guvohnoma bilan ushlangani hamda Termizda xizmat mashinasida yo‘l qoidasini buzgan YPX xodimi jarimaga tortilgani haqida xabar berilgandi.
Izoh (0)