Prezident Shavkat Mirziyoyev 18-iyun kuni Andijon viloyatidagi faollar bilan yig‘ilishda suv ta’minoti masalalariga ham to‘xtalib o‘tdi, deb xabar bermoqda “Gazeta.uz”.

Davlat rahbari so‘zlariga ko‘ra, viloyatda bu yili 162 milliard so‘m markazlashgan mablag‘lar hisobidan 460 kilometr ichimlik suvi, 23 kilometr kanalizatsiya tarmog‘i, 95 ta suv inshooti quriladi va rekonstruksiya qilinadi. Natijada 117 ta mahalladagi 200 ming aholining ichimlik suv ta’minoti yaxshilanadi va 37 ming aholi kanalizatsiyaga ulanadi.

Qayd etilishicha, 480 ta mahalladagi 1 375 kilometr ichki yo‘llar va 6 ta ko‘prikni qayta qurish va ta’mirlashni 1-oktabrgacha yakunlashi kerak.

Viloyatda 2021-yilda 1 147 kilometr elektr uzatish tarmoqlari, 300 dan ortiq transformator punktlarini qurish va kapital ta’mirlash ishlari amalga oshirilmoqda. Natijada 571 ta mahalla hamda 2 374 ta ijtimoiy soha va tadbirkorlik obyektining elektr ta’minoti yaxshilanishi ko‘zda tutilgan.

“Bu yil Jahon banki ishtirokida qiymati 36 million dollar bo‘lgan ‘Andijon shahrining issiqlik ta’minoti tizimini rekonstruksiya qilish va samaradorligini oshirish’ loyihasini boshlaymiz. Loyiha doirasida 3 ta yangi qozon va 24 kilometr issiqlik uzatish tarmoqlari quriladi, 271 ta ko‘p qavatli uy va 32 ta ijtimoiy soha obyektida alohida ishlaydigan isitish uskunalari o‘rnatiladi”, — degan Prezident.

Ikki oy muddatda ushbu loyiha bo‘yicha tender savdolarini o‘tkazib, qurilish ishlarini boshlanishi belgilandi.

Bundan tashqari Shavkat Mirziyoyev Bobur shoh ko‘chasi va Markaziy temiryo‘l vokzalini bog‘laydigan ko‘prik qurilishi haqida ma’lum qilgan.

“Yana bir yirik loyiha — Bobur shohko‘chasining ikki qismini bog‘laydigan va Markaziy temiryo‘l vokzali ustidan o‘tadigan, 700 metr uzunlikdagi ko‘prik quriladi. Natijada masofa 5 kilometrga, vaqt sarfi esa 25 foizga qisqarib, Andijon ahlining necha yillik orzu-niyatlari amalga oshadi”, — deb ta’kidlagan davlat rahbari.

Bundan avval Yangi Andijon shahrida metro qurilishi mumkinligi, Andijonda murakkab operatsiyalarga muhtoj, ehtiyojmand aholiga yordam berish bo‘yicha maxsus jamg‘arma tashkil etilishi haqida xabar berilgandi.