Namangan viloyati Yangiqo‘rg‘on tumanida o‘zgalarning qoramollarini o‘g‘irlash bilan shug‘ullanib kelgan uch kishidan iborat guruh aniqlandi. Bu haqda viloyati IIB axborot xizmati xabar berdi.
Ma’lum qilinishicha, 15-iyun kuniga o‘tar kechasi Yangiqo‘rg‘on tumanida yashovchi 16, 17 va 23 yoshli yigitlar 1981-yilda tug‘ilgan fuqaroning yashash uyi hovlisiga devor oshish yo‘li bilan kirib, daraxtga bog‘lab qo‘ygan narxi 15 million so‘mlik ikki bosh mollarini o‘g‘irlab ketgan.
Ular o‘zlarining jinoiy harakatlarini davom ettirib, shu kunning o‘zida 1979-yilda tug‘ilgan fuqaroning yashash uyi hovlisiga kirib, molxonasida bo‘lgan narxi 15 million so‘mlik ikki bosh molini, shuningdek, 43 yoshli fuqaroning molxonasidan 20 million so‘mlik ikki bosh molini o‘g‘irlab ketgan.
Ushbu holat bo‘yicha Yangiqo‘rg‘on tuman IIB huzuridagi Tergov bo‘limi tomonidan Jinoyat kodeksining 169-moddasi (o‘g‘rilik) 3-qismi bilan jinoyat ishi qo‘zg‘atilgan.
Avvalroq Marg‘ilonda ovsinining 8 mln so‘mlik tilla taqinchoqlari va pullarini o‘g‘irlagan ayolga jinoyat ishi qo‘zg‘atilgani, Farg‘onada qaynanasining plastik kartasidagi pullarni o‘g‘irlagan kuyov qo‘lga olingani, Qashqadaryoda qo‘shnilarining qo‘y-qo‘zilarini o‘g‘irlab, so‘yib sotishni kasb qilib olgan shaxs 3 yil muddatga ozodlikdan mahrum qilingani to‘g‘risida xabar berilgandi.
Izoh (0)